Капкадан керүгә, кемлегеңне беләләр

Татарстан Экология һәм табигый ресурслар министрлыгы, Казан мэриясе, «Татмедиа» басма һәм массакүләм коммуникацияләр буенча республика агентлыгы, Горький тимер юлының Казан бүлеге оештыруында башкала территориясендәге тимер юлларга рейд үткәрелде.
- Тимер юллар - Казанның капкасы. Тирә-юнь нинди хәлдә булса, поездларда килүчеләрдә дә шәһәребезгә карата шундый мөнәсәбәт туа, - дип фикерләре белән уртаклашты экология һәм табигый ресурслар министры Артем Сидоров. - Кызганыч ки, тимер юл буйлары чүп-чарга баткан. Авыллар һәм шәхси сектор янәшәсендә аеруча шапшаклык хөкем сөрә. Бистәләрдә чүп контейнерлары, бункерлар җитми.
Горький тимер юлының Казан бүлеге җитәкчесе Александр Черемнов: «Вахитов, Әмәт тимер юл станцияләре тирәләре бик пычрак. Җил шәхси сектордагы контейнерлардагы чүп-чарны тимер юллар буена кадәр тарата. Кайбер әдәпсезләр чүпләрне тимер юллар тирәсенә машинасы белән үк бушатып китә», - диде, борчылып. Казанның Дәрвишләр бистәсеннән башлап, Яшел Үзән районындагы Свияжск станциясенә кадәрге арада чүп-чарга күмелгән урыннарны һәммәбез дә күздән кичереп бардык. Поезд урманнар, елга-күлләр тирәләреннән уза һәм шул гүзәл табигатьнең чүп-чарга күмелеп ятуын күрү җанны әрнетә. 2007 елда булган җил-давыл вакытында ауган агачлар Дәрвишләр бистәсе янындагы урманлыкларда әле һаман җыештырылмаган.
Министр Артем Сидоров әйткәнчә, май аенда тимер юллар буйлап кабат рейд үткәреләчәк. Чүп-чарны рөхсәтсез урыннарга бушатучылар, тимер юлга тоташкан участокларын җыештырмаучылар штрафка тартылачак. Җитәкчеләргә - 15-30 мең сум, гражданнарга - 2-3,5 мең сум, юридик затларга 200-500 мең сум штраф салыначак. Әгәр кагыйдә бозып, кабат эләксәң, штраф күләме ике мәртәбә арттырыла.