Татарстан товарлары Кытай базарына чыгачак

Рөстәм Миңнеханов әйтүенчә, ике арадагы хезмәттәшлекне үстерүгә Татарстан зур игътибар бирә. «Без үз продукциябезне: йөк машиналарын, компрессорлар, шиннар, башка җиһазларны Кытай базарына чыгару белән кызыксынабыз», – дигән Президент. 

Татарстан Кытайның җиде провинциясе һәм муниципаль берәмлекләр белән килешүләр төзегән. Президент фикеренчә, Кытай төбәкләре арасында Россия белән иң тыгыз хезмәттәшлек итүче провинция – Хэйлунцзян. Рөстәм Миңнеханов андагы компанияләрнең Татарстанда да актив булачагына өмет белдергән. 
Кытайга эшлекле сәфәр кысаларында Президент Хэйлунцзян провинциясе губернаторы Ван Вэньтао белән дә очрашкан. Алар Казан һәм Харбин арасында туры авиарейслар ачу турында фикер алышканнар, дип хәбәр итә Татарстан Президентының матбугат хезмәте. Әлеге мәсьәлә хәл ителгән очракта, ике ил арасындагы мөнәсәбәтләр яңа дәрәҗәгә чыгачак. 

Билгеле булганча, Кытайның төньяк-көнчыгышында бердәнбер мөселман мәчете санала. Ул Харбинда урнашкан. Бу изге йортны ХХ гасыр башында Кытай Көнчыгыш тимер юлы төзелешендә катнашучылар төзегән. Рөстәм Миңнеханов әлеге татар мәчетенә күрсәтелгән ярдәм өчен Ван Вэньтаога рәхмәтен җиткергән. Бу тарихи һәм архитектура һәйкәле хәзер дәүләт тарафыннан саклана.

фото - tatarstan.ru