Ярышларга билетың булса, транспортта бушлай йөрисең

«Татмедиа» басма һәм массакүләм коммуникацияләр буенча республика агентлыгында кичә булган матбугат конференциясендә шәһәр эчке эшләр идарәсенең ЮХИДИ бүлеге җитәкчесе Рөстәм Ибраһимов кисәткәнчә, 5 тоннадан да авыррак йөк машиналары 1 июльдән башлап 6.00-22.00 сәгатьләр аралыгында шәһәр урамнарында йөртелмәячәк. Универсиада ярышлары барган көннәрдә Академик Парин, Хөсәен Мәүлетов, Академик Арбузов, Чистай урамнарында, Җиңү һәм Ямашев проспектларында, 3 нче транспорт дамбасында 18.00-02.00 сәгатьләр аралыгында транспорт хәрәкәте аерым бер сәгатьләрдә туктатылып торылачак. Бу чикләү җәмәгать транспортына кагылмый. «Универсиада автобуслары колонналары узганда, Оренбург, Мамадыш һәм Себер трактларындагы, Р.Зорге, Академик Сахаров урамнарындагы юл-транспорт чишелешләрендә дә транспорт хәрәкәте туктатылмаячак», - диде Рөстәм Ибраһимов.
6 июльдә Универсиада уты эстафетасы барышында 9.00-12.00 сәгатьләр аралыгында Җиңү проспектының, Оренбург трактының, Х.Мәүлетов, Павлюхин, Сәлимҗанов, Уң як Болак, Ташаяк, Батурин, К.Маркс, Пушкин, Бауман, Университет, Кремль урамнарының аерым участоклары автомобильләр өчен ябыла. 9-10 июль көннәрендә спорт йөреше ярышлары оештырылганда 00.00-12.00 сәгатьләр аралыгында Кремль Яр буе, Сәетгалиев, Ташаяк урамнарында хәрәкәт чикләнәчәк.
Шәһәр башкарма комитетының транспорт комитеты рәисе Айдар Абделхаков: «Универсиада ярышларына билет сатып алган кеше, ярыш узган көнне шул билеты белән җәмәгать транспортында, метроны да кертеп, көне буе бушлай йөри ала. Универсиада билетын кондукторга күрсәтергә генә кирәк», - дип сөендерде.
«Казан-2013» башкарма дирекциясе»нең генераль директоры урынбасары Азат Галиәхмәтов: «FISU таләпләре нигезендә спорт корылмаларына 500 метр радиуста транспорт чаралары кертелмәячәк. Универсиаданы ачу һәм ябу тантаналары көнендә җәмәгать транспорты иртәнге 3 сәгатькә кадәр эшләячәк. «Kazan-Аrena» стадионы белән «Кәҗә бистәсе» метростанциясе, Юдино, Дәрвишләр бистәләре, Торак мәйданчык арасында тамашачыларны махсус билгеләнелгән «автобус-шаттл»лар йөртәчәк. Универсиада тамашаларына рәхим итегез, ләкин шәхси автомобильдә түгел, ә җәмәгать транспортында килү хәерлерәк булачак», - диде.