Батыршин урамына капчыгыңны ала бар

Монысында Кайбыч, Буа, Питрәч, Әлки, Чүпрәле, Лаеш районнары фермерлары белән яшелчә үстерүче агропредприятиеләр сәүдә итте. Товар мулдан, бәяләр сәүдә челтәрләрендәгедән 20-30 процентка арзан. Гадәти көннәрдә шәһәр базарларында 280-320 сумга сыер итен сатып алырга өметләнмә дә. Сөяк тутырып бирергә мөмкиннәр, әлбәттә. Ярминкәләрдә берсеннән-берсе матур кисәкле итләрне рәхим итеп ал! Халык тавык йомыркасының дистәсен 45-55 сумнан чират торып ала. Савытка агызып сатыла торган сөтнең литры – 30 сум, аңа да чират. «Авыл сөте – каймак кебек куе бит ул», – дип сөйләшә-сөйләшә, чират уздыра шәһәр әбиләре.

– Буадагы агропредприятиедә борай (полба) җитештерелә. Казанлылар яратып ала башлады, шунлыктан шимбә саен алып киләбез. Ярминкә оештырылу авыл өчен дә бик файдалы, рәхәтләнеп сату итәбез, товарны акчага әйләндерәбез, – ди Буа районындагы Каенлык авылы фермеры Зөфәр Хәмидуллин. – Безнең монда гаилә подряды, хатыным Илсөяр – сатучы вазифасында. Мин игенчелек юнәлешендә эшлим. 20 баш ат та асрыйбыз.

Буадан Рөстәм Гайнетдинов 35 ел умартачылык белән шөгыльләнә икән.
– Куяннар да, саз кондызы (нутрия) да асрап мәш килдем инде мин. Шуннан бал кортларына күчтем, хәзер 180 оя тотабыз. Быел һәр оядан 44-45 килограмм бал суырттык. Бал кортларын яратырга кирәк. Алар шулхәтле сизгер һәм тәртипле җан ияләре, әгәр үзең тырышмыйсың икән, синнән күреп, бал кортлары да ялкаулана, – ди Рөстәм.
Лаеш районының Сокуры авылыннан Анатолий Игнатьев та ярминкәдә үзләренең аллы-гөлле балларын тезеп куйган.

– Бабайлар, әти умартачылар түгел. Бер иптәшем өйрәтте, инде 30 еллык тәҗрибәм бар үземнең дә. Көрән төстәгесе – карабодай чәчәге, аксылы – юкә чәчәге, ә алтынсу-сары төстәгесе – болын чәчәкләре, – дип, «экскурсия» үткәрде Анатолий.
Шунда ук бер ханым балның болын чәчәкләреннән җыелганын сатып та алды. Өч литрлы банкага тутырылган балның ярминкәдәге бәясе – 1200-1500 сум.

Татарстанның авыл хуҗалыгы һәм азык-төлек министрлыгы теләктәшлегендә оештырылган көзге ярминкәләр 23 декабрьдә тәмамлана. Авыл хезмәтчәннәре һәм агропредприятиеләр җитештергән сыйфатлы продукцияне арзанрак бәяләрдән сатып алу мөмкинлеген кулдан ычкындырмагыз.