Дөрес урында машина куймаган өчен 5 мең сумга кадәр штраф яный

Шуңа да шәһәрдә машина хуҗаларының күбесе ишегалдындагы буш урынга тимер атын куеп өлгерергә тырыша. Шул сәбәпле урамда атлап йөрер хәл юк, ишегалды тулы машина.

Бу ашыгыч ярдәм, янгын сүндерү машиналарына комачаулый, тоткарлыклар китереп чыгара. Кыш көне ишегалларын кардан чистартканда да тиешсез урынга куелган машиналар мәшәкать тудыра. Әлеге мәсьәләне кисәтү өчен юл иминлеге инспекторлары ишегалларындагы машиналарны барлады.
Хокук саклау органнары белән хезмәттәшлек итү буенча юл-патруль хезмәте бүлеге җитәкчесе урынбасары Айрат Сәмигуллин әйтүенчә, Казанда транспорт чараларын эвакуацияләү буенча рейд уздырылганнан соң, юл хәрәкәте кагыйдәләрен үтәмичә машинаны парковкалауга кагылышлы 90 административ хокук бозу очрагы ачыклаган. 62 машинаны махсус стоянкага алып киткәннәр. Сүз уңаеннан, ул машиналарны хуҗалары 02, йә 112 телефоны аша, шулай ук теркәлү урыны буенча эчке эшләр идарәсенең кизү тору бүлегенә шалтыратып белә ала.

– Административ хокук бозулар турындагы кодексның 27нче маддәсе 1нче бүлеге буенча тукталыш һәм машина кую урыны кагыйдәләрен бозган очракта, машинаны эвакуацияләргә мөмкиннәр. Дөрес урында машина куймаган өчен 5 мең сумга кадәр штраф яный. Юлда йөрү кагыйдәләрен бозып машинаны парковкалау кар чистартучы машиналарның эшен тоткарлый, шуңа да аеруча карлы, буранлы вакытларда һәр кеше үз машинасын кайгыртсын иде, – ди Айрат Сәмигуллин.

Шуны да онытмаска кирәк, штрафтан тыш машинаны эвакуатор алып киткән, стоянкада торган өчен дә түләргә туры киләчәк. Парковкалауда иң еш очрый торган тәртип бозулар: кешеләр машиналарын теләсә кайда, җәяүлеләр чыга торган юлда, инвалидлар машина кую урынында, тукталышларда калдыралар. Еш кына ишегалларында, парковкаларда номерсыз, йә номеры капланган  машиналарны күрергә мөмкин. Алар кыш көне дә кар астында кала, кайберләренең хуҗасы кем икәнен дә белеп булмый. Бу транспорт чаралары  аркасында башка автомобильләргә урын калмый. Татарстан Дәүләт Советына депутатлар номерсыз автомобильләрне махсус стоянкага эвакуацияләргә дигән тәкъдим белән мөрәҗәгать иткән. Номерсыз машиналар аркасында җәмәгать куркынычсызлыгына куркыныч яный дигән фикер дә җиткергәннәр. Сүз уңаеннан, Мәскәүдә бу тәҗрибә инде күптәннән кулланыла икән.