Дөресе дә шул – авылда җир җимертеп яшәп ята ул

Дөресе дә шул. Яңа гына 21 яшен тутырган Миләүшә ике яше дә тулмаган кызы белән авылда җир җимертеп яшәп ята. Иң гаҗәпләндергәне – аның юлсыз ерак. бер авылда газы да булмаган йортта яшәп, хуҗалыкта берүзе сыер, ике үгез, сарык һәм тавыклар асрап көн күрүе.

Миләүшәнең ире Радик Себергә китеп эшли. “Авылда эш булмаганлыктан китәргә мәҗбүр булды, аны Себергә озатканда кызыбызга тугыз гына ай иде”, – ди Миләүшә.

Күп балалы гаиләдә әтисез үскән кыз авырлыкның нәрсә икәнен һәм тормышта үзеңә генә таянырга кирәклеген белә, әлбәттә. Шуңа да, ничек кенә авыр булса да, башкалар янында ким-хур булмый дип, тешен кысып булса да яшәп ята.

Радикның әти-әнисе күптән вафат булган. Алардан калган йортта яши яшьләр. Никах укыткач, бер ай Миләүшәнең әнисендә яшәп алалар, аннары шушы йортка күчәләр. Өйдә күп еллар беркем яшәмәгән, юылмаган, булган әйберләребезне алдык та кереп утырдык, көтеп торучыбыз да булмады, дип искә ала Миләүшә. Әниләре үзенең сыерын да бирә. Соңрак үгезләр, сарыклар да асрый башлыйлар. Әнисеннән башка бер минут та тора алмаган кечкенә баласы әнисе белән иртән сыер саварга да чыга.

– Аны киендереп, коляскасы белән чыгарып утыртам. Сыер тавышыннан куркып елаган вакытлары да була. Утырган җирендә йокыга да киткәли. Көтү төшерергә барганда да үзем белән коляскага утыртып алып барам. Сыерны каршыларга да бергә йөгерәбез. Бервакыт көчле яңгыр яуганда, яшен астында икебезгә генә калырга туры килде. Якындагы электр баганасына яшен сукты. Сабыемны куеныма кысып, куркудан үзем дә калтыранып елаганымны әле дә онытмыйм, – ди ул.

Радик айлар буе өйдә юк, абзарда тузган электр чыбыклары гел өзелеп тора, җитмәсә, үгезләр дә тибенеп-дулап, алларындагы тагаракны җимереп бетерәләр. Аларны да Миләүшә үзе ялгап, төзәтеп тора. Утынын да әзерли, кыш буе мичкә ягарга туры килә икән. Болардан кала, яшелчә, бәрәңге бакчасы да бар. Сабырлыгы бетеп, күңелсезләнеп куйган вакытлары да булгалаган... Инстаграм белән дуслашканчы.
Башта ул инстаграмга лезгинка биегән мизгелен куя. Мәктәптә укыганда ук биергә яраткан кыз аны үзлегеннән өйрәнгән. Депрессиягә бирелгән бер вакытта шушы инстаграм коткара да инде аны. Бүген Миләүшәнең 23 мең язылучысы бар. Башта авыл тормышын төшереп видеолар элә башлый. Язылучылары сыер, үгезләрен дә, мичкә яккан вакытларын да төшерергә сорый. Авылның бигрәк тә шул якларын карыйсылары килә, ди яңа танышым. Олырак апалар лезгинка биегәнен ярата икән. Күбрәк бие дип сорыйлар. Менә шулар таккан да инде Миләүшәгә уңган килен дигән исемне. Араларында, синең кебек уңган киленем булса иде, дип тә язучылар бар икән. Шуннан блогер үзенең исемен дә шулай үзгәртеп куярга булган.

Юлсызлык та күңеленә бик тия. Район үзәге алардан алтмыш чакрым ераклыкта. Анда барып җитү өчен ике сәгать вакыт кирәк. Яңгыр яуган вакытлар булса, кыш көннәре юлга өчәр сәгать китә. Яшь кызның керфек тә куйдырасы, тырнак та буятасы килә. Юлда вакыт әрәм була дип, хәзер аларны үзе эшләргә өйрәнгән. Сораган кешеләргә дә тырнак буяп бирә.
– Ничек шундый шартларда яшисең дип шаккаталар. Авылда яшәгәч, малын асрамый булмый, бәрәңгесе дә кирәк. Авыл кызы булгач, эштән курыкмыйм. Язылучыларым арасында да, гел шулай батыр бул, горурланабыз, дип хуплап торучылар бар, – ди ул.