Вакытның агуына түзәрлек түгел. Яңа ел чыршыларының утлары сүнәргә өлгермәде, бусагага февраль килеп басты.
Батырлык ае. Тулыр-тулмас булса да, шулай атала ул. Моның сәбәпләре дә бар. 15 февраль – Совет гаскәрләренең Әфганстаннан чыккан көне. Герой-шагыйрь Муса Җәлилнең туган көне. 19ы – Фатих Кәримнең батырларча һәлак булган көне.
Ә инде 23 февральне барыбыз да беләбез. Әтиләр, абыйлар, бабайлар һәм малайлар көне. Элек Совет Армиясе көне дип йөртелә иде. Хәзер – Ватанны саклаучылар көне. Хәстәрлерәк хатын-кыз заты үзенең кадерле ир-атларына оекбаш, кырыну күбеге, одеколон ише ир-ат әйберләрен алдан ук әзерләп куйды инде. Балалар бакчаларында, мәктәпләрдә әтиләр бәйрәменә багышлап күңелле чаралар узды. Нәниләр танк, самолет рәсеме ясаса, зурраклар «Катюша»ны җырлады.
Элек-электән шулай килә. Гаиләдә кыз туса – матур, малай дөньяга килсә, батыр аваз салды, диләр. Әйе, ир-егетләргә борынгыдан шундый изге вазифа бирелгән. Алар Ватанны сакларга, аның өчен соңгы тамчы канын да кызганмаска тиешләр. Мондый батырлык үрнәгенең мисаллары да күп.
Ләкин соңгы елларда ир-ат белән хатын-кыз арасындагы аермалыклар күзгә күренеп юыла бара. Озын чәчле, әтәч койрыклы җитмәсә, ул әле буялган да, чәчәкле-чуклы күлмәкләр киеп йөри торган малайлар хәзер инде ят күренеш түгел. Ләкин ир-ат дигән сүзнең үзендә үк ниндидер ныклык, катылык сизелеп тора иде бит. Аларга якларлар дип ышанырга була иде. Ә хәзер?..
Иртән тукталышта бер үсмерне күрдем. Колагында – колакчыннар, кулында – телефон. Хәер, моның ние гаҗәп?! Барысы да шулай бит. Ник дөньясы ишелми, керфеген дә селкетми. Мондыйлар белән разведкага барасы килми нигәдер. Дөрес, алар үзләре дә бик барабыз дип атлыгып тормый. Хәрби хезмәт компьютер уены түгел шул ул. Анда гына ул «үлгәч» тә әллә ничә тапкыр кабаттан «терелеп» була. Әллә шул уеннар безнең малайларга бөркет егет булып җитлегергә комачаулыймы? Кайда ялгыштык соң без? Элек хәрби хезмәткә бару зур дан, мәртәбә саналса, хәзер, киресенчә, бармый калу дәрәҗәлерәк тоела башлады бугай бит.
Бу атнаның якшәмбесендә ир-атларны тагын зурлап котларга җыенабыз. Теге үсмерне дә котларлар. Ул да ир-ат затыннан бит. Теләкләр арасында: «Җебек булма, егет бул!» – дигәне дә булсын иде.
Комментарийлар
0
0
сабыйларга хэрби кием кигезу - сугышны бэйрэм итеп курсэту
0
0