16+

Гаяз Исхакый музееның язмышы ничек хәл ителер?

Татарстан Милли музеенда Гыйльми Совет утырышының киңәйтелгән утырышы булды. Фәнни тикшеренүләр музей эшчәнлегенең төп юнәлешләренең берсе булып тора.

Гаяз Исхакый музееның язмышы ничек хәл ителер?

Татарстан Милли музеенда Гыйльми Совет утырышының киңәйтелгән утырышы булды. Фәнни тикшеренүләр музей эшчәнлегенең төп юнәлешләренең берсе булып тора.

Хәзерге вакытта музей һәм фәнни берләшмә арасында тыгыз элемтә урнашкан. Уртак күргәзмә проектлары, фәнни конференцияләр, атрибуцияләр һәм коллекцияләрне фәнни шәрехләүләр – әнә шуңа дәлил. Әлеге чарага музей хезмәткәрләре, галимнәр, җәмәгать эшлеклеләре җыелган иде.

Милли музей директоры Гөл­чәчәк Нәҗипова хезмәткәрләргә рәхмәт сүзләрен җиткерде.
– Гыйльми совет – теләсә нинди фәнни-тикшеренү учреждениесендә мотивация булдырыр өчен мөһим элементларның берсе. Ул музейның эшчәнлегенә бәя бирер, аның дөрес юлдан барганлыгын билгеләр, нәрсәне дә булса үзгәртергә кирәклеген әйтер өчен кирәк, – диде директор.
Төп доклад белән генераль ­ди­ректорның фәнни-тикшеренү эше буенча урынбасары Светлана Измайлова чыгыш ясады. Аның сүзләренә караганда, узган елда да күп төрле эшләр башкарылган.
– 2018 елда безнең төп эшләр стационар экспозицияләр, күргәз­мәләр төзү, дәүләт музейлары концепциясен булдыру, музей коллекцияләрен, предметларын фәнни тикшеренү булды. Узган елның иң зур вакыйгасы дип мин Габдулла Тукайның әдәбият ­музее ачылуын әйтер идем. Бу – галимнәр белән уртак зур эшебез булды. Әлеге экспозицияне Тукайның йорты дип тә санарга хак­лыдыр без. Ул укытучылар өчен дә, балалар аудитория­се өчен дә кызыклы булды, – диде Светлана Измайлова.
Светлана Измайлова әйтүенчә, Шәриф Камал музее буенча эшләр дә тәмамланып килә.

– Без аны татар китабы йорты буларак күрәбез. Әлеге экспозиция­не төзүгә дә яңа яктан килеп карадык. Татар китабы культурасының тарихын гына чагылдырып калмыйча, Татарстан китап нәшрияты белән дә актив хезмәттәшлек алып барачакбыз. Монда киң танылу алган китап­ларны да сатып алырга мөмкинлек булачак, – диде ул.


Шулай ук ведомство музейларын төзүгә дә зур игътибар күрсәтелүен ассызыклап узды. Казан дары заводы, Кама Тамагының туган якны өйрәнү, Юстиция министр­лыгы музейлары – әнә шуның ачык мисалы. Актанышта Әлфия Авзалова музее ачылачагы турында да әйтте.
Филология фәннәре докторы Хатыйп Миңнегулов Светлана Измайловадан Гаяз Искахый музееның язмышы турында кызыксынды.
– Гаяз Исхакый – татарның йөз аклыгы, ләкин әле дә булса музей мәсьәләсе хәл ителмәгән. Моның өчен оят бит инде. Нәрсә эшләргә була икән монда? – диде ул.

Светлана Измайлова вазгыятьнең катлаулы булуын әйтте.
– Мин, чыннан да, Гаяз Исхакый музееның язмышын хәл итәр өчен Яуширмә авылына барган делегация составында идем. Вазгыять бик катлаулы, әлбәттә. Әлеге музей Чистайның музей-тыюлыгына карый. Бәлки аны чыннан да Чис­тайга күчерергә кирәктер дигән мәсьәлә күтәрелде. Ләкин без, музей берләшмәсе вәкилләре, мемориаль музей әдипнең туган җирендә булырга тиеш, дигән фикердә торабыз. Аннан соң, без туристик маршрутлар булдырып, әлеге музейның үсешенә ярдәм итә алабыз. Хәзерге вакытта Татарстан музей марш­рутлары юл күрсәткечен төзибез. Әлеге маршрутка Гаяз Исхакый музеен да кертү мөмкинлеге бар. Бу оч­ракта әлеге карар иң оптималь һәм дөрес юл булыр иде. Әлеге маршрут музейга яңа тормыш бүләк итәр иде дип уйлыйм, – дип җаваплады.

Милли музейның якын киләчәктә торган максатлары булып ­ТАССРның 100 еллыгына багышланган үзәк экспозицияләр, 1941-1945 еллардагы Бөек Ватан сугышының музей-мемориалының яңа экспозиция­ләрен, Салих Сәйдәшев музеен һәм башка филиалларны булдыру, 2020 елда Казанда республиканың Милли музееның 125 еллыгына багышланган Халыкара музей форумын уздыру тора.

Язмага реакция белдерегез

0

0

0

0

0

Реакция язылган инде

Комментарийлар

Мөһим

loading
2
X