8 килограммлы гөмбә тапкан Ришат Мусин: «Дусларга да өлеш чыгардык»

Мондый зурлыктагы куык гөмбә бик сирәк очрый икән. Ришатның сөйләвенә караганда, әлеге гөмбәгә алар каенлыкта тап булган. Гөмбәне ярып, бер өлешен кыздырып ашаганнар, бер өлешен кышка суыткычка катырырга куйганнар. Дусларга да өлеш чыгардык, ди Ришат. Тәме белән шампиньон гөмбәсен хәтерләтә икән. Ришат гөмбәгә вакытлары булганда йөрүләрен, ә иң яраткан гөмбәсе шампиньон белән рядовка булуын сөйләде. Гөмбәче аларны күп итеп суган һәм борыч белән кыздырып, соңыннан каймак та салып ашарга киңәш итте.

Казан университетының гомуми экология кафедрасы ассистенты, миколог Ким Потапов куык гөмбәгә аңлатма бирде.

– Бу гөмбә гигант лангермания дип атала. Размеры генетика белән бәйле. Аны Татарстанда да теләсә кайда очратырга мөмкин. Кырда да табучылар бар. Танышымның җиләк түтәлләре янында үскән иде. Парк-скверларда да, ташландык кош фабрикасы территориясендә дә күргәнем булды. Гигант гөмбәләрнең авырлыгы 10 килограммга, диаметры 35 сантиметрга кадәр җитәргә мөмкин. Аның эшләпәсе дә, сабагы да юк. Үзе шар формасында була. Җәй башыннан октябрьгә кадәр үсә. Куык гөмбә ашарга яраклы, әмма төсе сарылана башлагач, ризык итеп кулланырга ярамый. Бу гөмбә тиз һәм җиңел кибә, – дип аңлатты белгеч.