#Язмалар 14 июля 2018, 11:19

Гүзәлем: «Хәләл бизнеска күчәбез»

14 июля 2018, 11:19

Артистлар бигрәк уңган халык булып чыкты: көненә берничә концерт, банкетта чыгыш ясап кына чикләнмиләр, сәхнәдән тыш хәтта бизнес белән дә шөгыльләнергә өлгерәләр икән! Кем ничек акча эшли – шул хакта аларның үзләреннән сораштык.

Скопировать ссылку

– Яулыклар белән электән мавыгам. Интернет-кибетемне ачарга да озак әзерләнеп йөрдем. Һәм, ниһаять, быел хыялым тормышка ашты. Мәскәүгә барып күп итеп яулыклар сатып алдым да интернет аша сатуга элдем. Шундый ажиотаж булыр дип күз алдына да китермәгән идем! Беренче көнне көне буе заказлар кабул итеп утырдым. Үзем моңарчы 600 сумга яулык сатып ала идем. Әмма, миңа калса, әлеге бәя яулык өчен кыйммәтрәк. Шуңа күрә 300 сумнан куйдым һәм бу бәя күпләр өчен оптималь булып чыкты.

Әлегә кибетемдә бары тик яулыклар гына сатыла. Киләчәктә ассортиментымны киңәйтеп, башка төрле баш киемнәре, мөселман күлмәкләрен дә сатасым килә.

Мөселман стиле соңгы арада аеруча популяр. Шәхсән үземә дә бу стиль бик ошый. Миңа башка баш киемнәре килешми, ә менә яулык әйбәт. Тик яулыкның шул ягы бар: һәрвакыт аның төсенә китереп бизәнергә, күлмәкләрне һәм аксессуарларны дөрес сайларга кирәк.

Күпчелек артистлар кебек, без дә бәйрәмнәр уздыру белән шөгыльләнәбез. Тиздән хәләл бизнеска күчәбез. Алкоголь эчемлекләрсез барган чараларны уздыру күпкә күңеллерәк. Шунысы куандыра: көннән-көн күбрәк яшьләр аракысыз туй уздырырга дигән карарга килә. Бу бик матур күренеш һәм яшьләрнең үзләренә дә күпкә отышлырак.

#Салават Миңнеханов #Гүзәлем