Шәһри Казан

Иртә торсаң, уңарсың: ярминкәдә сыер итен – 280, йомырканы 40 сумнан алырга мөмкин

Моннан 45-50 еллар элек әти-әниләр Казанга барган чакларында, күчтәнәч итеп, прәннек алып кайталар иде. Әлеге түгәрәк яки билле прәннекләрнең тәме бүген дә тел очында тора.

Дөрес, авыл кибетенә дә кайта иде, ләкин ул прәннекләр тешеңне сындырырдай каткан, хәлвәләре җебеп, сагызланып беткән була иде.

- Әни, прәннек сатып алыйк әле!
Батыршин урамындагы ярминкәдә бер баланың сүзләре колакка чалынып, хатирәләрне кузгатып җибәрде. Гаҗәп, хәзер авыл күчтәнәч итеп шәһәргә прәннек алып килә.
- Чәк-чәк тә, прәннек тә пешерәбез. Ипиләребез биш төрдән, ә татлы ризыклар егерме төрдән артык, - дип, елмая Буа районы кулланучылар җәмгыятенең ипи заводы кондитеры Зөлфия Мифтахова.


Шул ук районның Ташкичү авылыннан яшь фермер Салават Нигъмәтуллин: ”Алты ел инде 1 мең баш каз алып үстерәбез”, - дип шаккатырды.

Берничә ел 10-15 бройлер чебешне үземнең дә үстергәнем булды. Җәй буе кычыткан чаба-чаба кул калмады. Монда мең баш! Хәер, Яңа Чишмә районында ун еллар элек үк 1500-2000 баш каз үстерүчеләр бар иде.
- Хатының белән карыйсыңдыр инде бу кадәр армияне? - дим.
- Юк, мин әле өйләнмәгән, - дип серен дә чишеп ташлады Салават. - Әти-әниләр белән бергәләп карыйбыз. Бер көнлекләрне алабыз. Бәпкәләрнең беразы үлә дә инде, мескеннәрнең. Хезмәт үзен аклый: каз түшкәсен 1200 сумнан сатабыз. Ярминкәләрдә сентябрьдән бирле бик теләп катнашам. Бөтен нәрсә оештырылган, кая барып сату итим икән, дип борчыласы түгел.

Буа районында Зөлфия исеме модада ахырысы. Татар Боерганы авылы хатынының да исеме Зөлфия булып чыкты. “Сөйли белмим мин”, дип башлаган иде, тулы бер лекция тыңлатты, мәгәр.
- Ирем Раил белән атлар, сыерлар һәм тавык-чебеш астыйбыз. Горурлыгыбыз - атлар. Татар халкы гомер бакый ат яраткан, ат асрарга тырышкан. Ат ите организм өчен файдалы, тәнгә куәт бирә. Элегрәк ат итен күбесенчә пенсионерлар сатып ала иде. Хәзер яшьләр дә яхшы әйберне тиз сизенә, алар да ала ат итен. Ат казылыгы да ясыйбыз, - дип сөйләде Зөлфия Хисамова.

Реклама

Батыршин урамындагы ярминкәдә узган шимбәдә Буа, Әлки, Чүпрәле районнары һәм Казанның агропредприятиеләре сәүдә итте. Өстәлләрдә прәннектән башлап, җаның ни тели шул бар. Ит һәм сөт продуктлары ветеринария тикшерүе узган. Тагын бер әһәмиятле ягы: продукция Татарстанда җитештерелгән, сәүдә челтәрләрендәге бәяләрдән 15-20 процентка арзанрак.

Казанда авыл хуҗалыгы ярминкәләре һәр шимбәдә 28 декабрьгә кадәр үткәрелә. Сәүдә иртәнге 6.00 сәгатьтән көндезге 12.00-14.00 сәгатькә кадәр. Сер итеп кенә язам: Казанның тәҗрибәле бабайлары белән әбиләре иртәнге биштә үк куларбаларын алып, ярминкәгә кузгала.  

Сыер ите (килограммы) - 280-320 сум,
Бәрәңге - 12 сум,
Кәбестә - 12 сум, Кишер - 16 сум, шикәр комы - 36 сум,
Йомырканың (дистәсе) - 40-65 сум.

Автор фотолары

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: