#Язмалар 10 ноября 2020, 12:52

Кар да вирустан куркамы икән әллә?

10 ноября 2020, 12:52

Гадәттә, ноябрь башында инде җир өслегенә туң ята. Быел синоптиклар туңны да, карны да әле тиз генә көтәсе түгел, ди. Ноябрьдә һава температурасы норма тирәсендә булачак дип фаразланса да, хәзер күзаллауларны үзгәрткәннәр.

Скопировать ссылку

Казанда, шул исәптән Татарстанда да, ноябрь гадәттәгедән җылырак булачак икән. Без моны айның беренче көннәрендә үк тойдык. Алдагы атнада да температура нормадан 3-5 градуска җылырак булачак, дип фаразлый КФУ галимнәре.

Метеокүзәтүләр тарихында иң җылы ноябрь 2013 елда теркәлгән. Анда уртача айлык температура 3,5 градус булган. Иң салкын ноябрь 1891 елда булган, ул елны һава минус 10,8 градус икәне мәгълүм. Узган елгы ноябре дә рекордлар исемлегендә. Мисал өчен 7 ноябрь көнне Казанда 15,3 градус җылы булган.
Җылы әйбәт инде ул. Калын курткалар киясе түгел. Өйләрне җылытуда да экономия. Әмма һәр нәрсәнең үз вакыты була. Көзнең соңгы аенда без кар өстеннән йөрергә күнеккән, ләбаса.

Ә кар безне әле тиз генә сөендерергә ашыкмый, булса кирәк. Синоптиклар ноябрьнең 20ләренә кадәр Казанда кар көтүнең мәгънәсе юк, ди. Үзгәртелгән фаразлар буенча, ноябрьнең соңгы көннәрендә җир өслеген кар капларга мөмкин. Аномаль җылы дип исәпләнгән 2008 һәм 2013 елларда җир өслегенә кар 17 һәм 21 ноябрь көннәрендә яткан икән. Быел да шулай булыр дип өметләнәсе кала.

Лилия ЛОКМАНОВА

#кыш