Казан: киләчәккә план һәм фаразлар нинди?

– Генераль план шәһәр халкының күпчелегенең мәнфәгатьләрен кайгырта. Бу документтагы бурычларны хәл итү Казанны күп елларга алдан фаразлап үстерүне күздә тота, – дип фикерләре белән уртаклашты шәһәр мэры Илсур Метшин «эшлекле дүшәмбе» киңәшмәсендә.

Башкала мэры Генераль план проектын тикшерүдә катнашкан казанлыларга рәхмәт әйтте, тәкъдимнәрнең проектны әзерләгәндә файдаланылачагына ышандырды.
– Шәһәр читләрендә берничә «кайнар нокта» барлыкка килде. Кешеләрне аңларга була, чөнки беркем дә кискен үзгәрешләр теләми, кешенең холкы шундый. Ләкин шәһәр ул – тере организм, ул үсә, киңәя, бу агымны туктатып булмый, – диде мэр.

Казан халкы аеруча юллар төзелеше проектлары буенча борчылуын белдерә. Телибезме-теләмибезме, автомобильләшү шәһәр төзелешенә тәэсир итми калмый.
– Казанда 2006 елда 180 мең автомобиль иде, – дип дәвам итте сүзен Илсур Метшин. – Хәзер аларның саны 430 меңгә җитте. Бу машиналар Киров, Уфа яки Самарадан түгел, ә Казан кешеләренеке һәм без транспорт схемасын формалаштырырга тиеш. Безгә коридорлар калдыру, «кызыл линия»ләр билгеләү зарур. Ул урыннарда 9 катлы йортлар, сәүдә үзәкләре яки башка биналар барлыкка килмәсен. Бу мәсьәләләр бер көндә генә хәл ителми.

Шәһәр башлыгы Казанның Зур боҗра юлын төзү планы инде 1969 елда ук уйланылганлыгын искә алды. Бүген шул хыяллар тормышка ашырыла, Зур боҗра юл төзелеше инде Борисково бистәсе тарафларында алып барыла.
Генераль планны безгә Мәскәүнең Генераль план институты белгечләре әзерли.

– Әлеге коллективның профессиональ дәрәҗәсенә шикләнмибез. Тик алар да тылсымчылар түгел, – диде мэр Илсур Метшин. – Алар да 250 меңләп машина күктә очып йөри ала торган транспорт коридоры ясый алмый. Без шәһәрнең киләсе көне өчен җаваплы һәм күпчелек мәнфәгатен кайгыртып карар кабул итәргә тиеш.

Генераль план буенча җә­мәгатьчелек тикшерүе йомгак­лары 29 августта Казан муниципаль берәмлегенең документлар һәм хокукый актлар тупланмасында басылып, KZN.RU рәсми порталына куела.

«Казанда 2006 елда 180 мең автомобиль булса, хәзер аларның саны 430 меңгә җитте. Бу машиналар Киров, Уфа яки Самарадан түгел, ә Казан кешеләренеке»
Илсур Метшин,  Казан мэры.

Дамир Бәдриев.