Казан үзәгендә - айлы кич

Бүген, 2 гыйнварда, казанлылар һәм шәһәр кунаклары өчен әзерләнгән Яңа ел программасы кысаларында, Милли музейның эчке ишегалдында танылган Россия рәссамы Леонид Тишковның «Ай таганнары» арт-объекты ачылды. 

"Бу мәйданчык -көчле урын, яңа форматта эш башлау өчен монда яхшы мөмкинлекләр бар. Проект та эксперимент рәвешендә уза. Кешеләргә дә ошаячак, дип уйлыйм. Саф һавада иҗат дөньясына керик", - диде Татарстанның мәдәният министры Ирада Әюпова. 

«Ай» лайтбоксы таганнарда кешеләр атынганда, тирә-юньне тылсымлы нурлар белән яктырта. Инсталяция -  дөньяның күп илләрендә күрсәтелгән «Хосусый ай» проектының бер өлеше.

«Ай таганнары»ның премьерасы нәкъ менә Казанда уза. Кунакханә ишегалдында заманча сәнгать әсәрләрен күрсәтү -Татарстан Республикасы Милли музее өчен генә түгел, ә Казаныбыз өчен дә яңа тәҗрибә.

"Бу проект шәһәр мохите өчен уйлап табылган. Бөтен планетабызны урап чыкты, дияргә була. Ул безне берләштереп тора. Максаты бушап калган күңелләребезне тулыландыру", - диде сәнгать белгече, проектның Казандагы кураторы Гүзәл Фәйзрахманова. 

Һәр кич 17.00 сәгатьтән 21.00 сәгатькә кадәр музей кунакларының арт-объектны карау мөмкинлеге бар.

Сез дә шәһәр үзәгендә урнашкан легендар кунак ишегалдында кичегезне күңелле үткәрегез, рәссам Тишков уйлап тапкан романтик әкият атмосферасында күңел ачыгыз!

                                                   Динара Әхмәт