Гөлзада Сафиуллина: “Ул иң классик һәм халыкчан баянчы булып, бик күп баянчыларны тәрбияләгән бөек музыкант булып безнең хәтердә калачак. Ул безнең белән Үзбәкстан, Казахстан, Әзербайҗан кебек илнең төрле почмакларында зур сәхнәләрдә чыгыш ясады. Без аның белән курыкмыйча сәхнәгә чыга идек. Ул беркайчан да бер нотага да ялгышмас иде. Килеп төшүгә, репетиция ясый иде, репетициясез сәхнәгә чыкмады. Киемнәре һәрвакыт пөхтә булды”.
Разил Вәлиев: “Рамил белән бик күп еллар элек Илһам Шакиров янында таныштык. Һәм аннары да озак еллар Илһам ага янында күрдем аны. Илһам абыйның башка баянчылары да бар иде, әмма Рамил башкалардан аерылып торды, алыштыргысыз баянчы иде. Ул һәркем белән туганы белән сөйләшкән кебек сөйләшә иде. Күңеле ачык, нечкә булуына шакката идем. Музыка, тарих, милләт турында сөйлиме – һәрвакыт бөтен күңелен, җанын биреп борчылып сөйли иде. Ул – милләтпарвәр шәхес иде, һәр җирдә миллилек эзли иде”.
Рифат Фәттахов: “Матбугатта Рамил Курамшинны бәхетсез, мескен булган дип күрсәтү тенденциясе бара. Мин моның белән күңелемнән дә килешмим, Рамил абый да килешмәс иде. Рамил Курамшин бик бәхетле, лаеклы тормыш юлы үтте. Ул - горур шәхес иде. Рамил Курамшин – киңкырлы шәхес, ул җырчы да, композитор да, публицист та. Әмма иң элек ул – музыкант, баянчы. Рамил Курамшин – татарның бөек баянчысы дип курыкмыйча әйтә алам. Ул үзеннән соң гаҗәеп дәрәҗәдә киңкырлы, бай мирас калдырып китә. Әлбәттә, аның биографиясендә иң якты сәхифә - Илһам Шакиров белән эшләгән еллар. Игътибар итсәгез, Илһам Шакировның татар сәнгатенең алтын фондына кергән классик язмаларының күпчелеге Рамил Курамшин баяны белән язылган. Ул - татар дөньясында баян өчен телевидениядә иң беренче булып зур концерт яздырган шәхес. Һәм бу концертны Россия телевидениесе дә кат-кат күрсәтте. Рамил Курамшин - татар музыка сәнгатендә беренче булып оркестр һәм баян өчен концертино язган шәхес. Ул - дәреслекләр авторы. Аның исемендә бүген фестиваль-конкурслар үткәрелә, яшьләр аның стилен, техникасын өйрәнә. Бу бит Рамил Курамшин мәктәп калдырып китте дигән сүз. Шундый кеше бәхетсез була аламени? Максатыбыз – Рамил Курамшинның зурлыгын, мәшһүрлеген, әһәмиятен аңлау һәм моны бүгенге көнгә дә, киләчәккә дә җиткерү. Кызганыч, быел Рамил абыйның 75 яшьлеген сәхнәләрдә үткәрә алмадык, сәбәбен беләсез. Әмма ул көннәрдә Рамил абыйга игътибар зур булды: ТР Президенты аппараты да, Хөкүмәт тә, Дәүләт Советы да, ТР Мәдәният министрлыгы да, Бөтендөнья татар конгрессы да килде. Рамил абыйның күңеле бик риза булдык кебек”.
Рамил абыйны, үз васыяте буенча, туган ягы Түбән Новгород өлкәсе Сергач районы Кочки-Пожарки авылында җирлиләр. Хуш, бәхил бул, урының оҗмахта булсын, Рамил абый!..
Кызыклы яңалыкларны күзәтеп бару өчен безнең МАХ каналына кушылыгыз.
Комментарийлар