Хатын-кыз ат кебек эшләргә тиешме?

HeadHunter тикшерүләр хезмәте хәбәр итүенчә, җитәкчеләрнең өчтән берен нәфис затлар тәшкил итә. Сәясәттәге хатын-кызларның да роле көчәя. Киләсе елда булачак Россия Президенты сайлауда да гүзәл зат катнашырга җыена. Узган атнада танылган телевидение алып баручысы Ксения Собчак президент сайлауларына үз кандидатурасын тәкъдим итәргә уйлый, дигән хәбәр таралды. Собчак фикеренчә, сайлауда катнашуы Россиядә кирәк булган үзгәрешләргә бер адым булырга мөмкин. Ә сез ничек уйлыйсыз: хатын-кызның илкүләм мәсьәләләрне хәл итәргә көче җитәме?

Булат Бәйрәмов, «TMTV» телеканалы алып баручысы:

– Ил, республика белән ир-ат идарә итәргә тиеш. Дилбегә аның кулында булу дөрес дип саныйм. Дөньякүләм мәсьәләләрне хәл иткәндә, аңа салкын канлы да булырга кирәк, ә хатын-кыз миһербанлы, йомшак күңелле. Аның шул сыйфатларын үзләренең максатларында да кулланырга мөмкиннәр бит. Аннары, хатын-кыз эмоцияләргә дә таянырга ярата. Ә мәктәп директоры яки башка учреждение җитәкчеләре хатын-кыз булуда бернинди дә кимчелек күрмим. Акыллы, сәләтле, һәрьяктан булдыклы хатын-кызларыбыз күп безнең.

Фәрит Заһидуллин, Биектау, Урманчы:

Ксения Собчакның президент булырга шансы бөтенләй юк. Җитди кеше түгел бит ул. Мин президент булырлык хатын-кызларны гомумән белмим. Бәлки, алар бардыр, без генә белеп бетермибездер. Зирәк, халык хөрмәт иткән абруйлы хатын-кыз ил белән идарә итә ала дип уйлыйм. Әмма алар тормышның төбеннән күтәрелгән булырга тиеш, шул вакытта гына халыкның мәнфәгатьләрен яклый алачак. Министрлар, район башлыклары, колхоз рәисләре арасында да бар гүзәл затлар. Менә дигән итеп эшлиләр.

Наилә Җиһаншина, Татарстан һәм Россия мөслимәләр берлеге рәисе:
 
– Ил белән ир кеше җитәкчелек итсә яхшырак, аның мөмкинлекләре күбрәк. Ә хатын-кыз ул беренче чиратта, хуҗабикә. Аның эшкә дә барасы, өйне дә карыйсы, бала да тәрбиялисе бар. Үз өстенә бөтен вазифаны да алып, ат кебек эшләргә тиеш түгел.