Коронавирустан чыгабыз, кире кермәү үзебездән тора

Татарстанның үз планы

Казан Кремленең рәсми вәкиле Лилия Галимова 7 майда үткәрелгән онлайн конференциядә хәбәр иткәнчә, Россия Федерациясе Президенты Владимир Путин үткәргән видеокиңәшмәдә Татарстан Президенты Рөстәм Миңнеханов та катнашкан.
- Республика хәзерге санитар-эпидемиология хәлгә карап, үзбикләнү режимыннан чыгу буенча үз планын әзерли. Татарстан Республикасы Президенты Рөстәм Миңнеханов үзбикләнү режимыннан чыгу планын гамәлгә ашырганда иминлекне тәэмин итү максатында, санитар-эпидемиология таләпләрен катгый үтәү бурычы куйды. “Кешеләр сәламәтлегенә зыян килмәскә тиеш, Татарстан халкының сәламәтлеге-төп бурыч”,-диде Рөстәм Нургалиевич. Роспотребнадзор идарәсенә катгый күзәтчелек алып барырга кушылды, таләпләрне үтәмәүчеләргә административ чаралар күреләчәк, хәтта, эшчәнлекләре туктатылачак,-дип кисәтте Лилия Галимова.

Үзбикләнүдән чыгу этаплары

Россия Федерациясе Роспотребнадзор башлыгы Анна Попова бәяләгәнчә, Татарстан үзбикләнү режимыннан чыгуның беренче этабында тора. Үзбикләнүдән чыгу 3 этаптан гыйбарәт.

1 нче этап: ачык һавада спорт белән шөгыльләнергә, балалар белән урамда йөрергә рөхсәт, ләкин ара-дистанция саклау зарур;
2 нче этап: гаилә белән җәмәгать урыннарында йөрергә рөхсәт;
3 нче этап: кунакханәләр, җәмәгать туклану предприятиеләре, сәүдә челтәрләре, уку йортлары кабат ачыла, предприятиеләр эшли башлый.

- Беренче этап турында якын көннәрдә игълан ителәчәк,-диде Лилия Галимова.
Ләкин, кибетләрдә, җәмәгать транспортында битлектән йөрү һәм дистанция саклау тиешле.

“Космонавт” табиплар

- Татарстан Президенты Рөстәм Нургалиевич республика медицина хезмәткәрләрен югары сыйфатлы махсус саклагыч киемнәр белән тәэмин итәргә кушты, чөнки табиплар хәвеф зонасында. Бу бурыч республиканың сәламәтлек саклау министрлыгына, шулай ук сүнәгать һәм сәүдә министрлыгына йөкләнде,-диде Лилия Галимова. Татарстан Президенты Рөстәм Миңнеханов:”Шәхси саклану чаралары сертификатлы, югары сыйфатлы булырга тиеш. Безнең медицина хезмәткәрләре максималь рәвештә саклансын. Аларның эше хәвефле, хәзер эпидемия вакытында вирус таралуын чикләү аеруча мөһим. Табиблар татарстанлыларның гомерен саклый”,-дигән.

Күчтәнәчләр тагын була әле

Татарстан Президенты Рөстәм Миңнеханов тәкъдимендә республикада 29 апрельдән “Ярдәм янәшә” акциясе башланды. Республика коронавирус вакытында ярдәм йөзеннән азык-төлек тупланмалары әзерләде. Әлеге тупланмалар мөхтаҗларга: ветераннарга, ялгызак пенсионерларга, аз керемлеләргә, эпидемия чорында эшчәнлекләре туктатып торылганлыктан аеруча зыян күргән ата-аналарның балаларына бирелә.

- Барлыгы 55 мең тупланма әзерләнде, 6 майга шуның 47 мең 987се таратылды. Калганнары 2 көндә таратып бетереләчәк. Тупланмалар Казан, Чаллы, Түбән Кама, Чистай, Бөгелмә, Әлмәт шәһәрләрендә, шулай ук районнарда таратыла, - диде Лилия Галимова.
 “Ярдәм янәшә” акциясе кысаларында азык-төлек тупланмасы тарату 4 мәртәбә оештырыла. Беренче этап тәмамлана, димәк, әле тагын 3 тапкыр азык-төлек тупланмасы киләчәк.