Коточкыч фаҗига эзеннән: "Күрәзәче: «Кардәшегезне Боровецк урманындагы су янында эзләгез», - диде"

Полиция мәгълүматлары буенча, ирне күршесе үтереп, мәетен кисәкләргә тураклаган. Ике ел элек булган фаҗига турында Чаллы шәһәре Эчке эшләр идарәсе башлыгы Айрат Ханбиков "Челнинские известия" басмасына биргән әңгәмәсендә сөйләгән.

Узган ел полиция һөҗүмченең эзенә төшә алган. Әлеге җинаятьтә Беляевның күршесе, 23 яшьлек егетне шикләнә башлыйлар. Хокук саклау органнары белдергәнчә, ул күршесен үтергән, ә аннары корбанының мәетен кисәкләргә тураклаган. Беляевның башын һәм кулларын Боровецкий күпере астындагы бәкегә ташлый, гәүдәсен һәм аякларын чүп контейнерларында калдыра. Хәзер полиция һәлак булган ирнең калдыкларын эзли.

Мәрхүм Әнәс Беляевның сеңлесе "Челнинские известия" басмасына сөйләгәнчә, ир аралашучан, пөхтә кеше булган. Шәхси компаниядә сакчы булып эшләгән. Яхшылар рәтендә булган, аның турыдан-туры җитәкчесе иртән аны эшкә алып бару өчен аның артыннан кергәләгән.

Хатыны белән аерылышканнан соң 59 яшьлек ир-ат тулай торакта яши.

"Ул күршеләреннән зарланды. Бервакыт бәхәсләре хәтта йодрык уйнау белән тәмамланган. Без, туганнар, Әнәскә, әни янына күченергә киңәш иттек. Әнигә ул вакытта инде 83 яшь иде. Ул улын шатланып кабул итәр иде. Ләкин Әнәс теләмәде. Аннары ул күршеләр белән татулашты кебек. Без әллә ни булыр дип уйламадык», - дип сөйли хатын. Абыйсы белән соңгы тапкыр телефон аша сөйләшүен исенә төшерә: «30 ноябрьдә шалтыратты һәм холодецны ничек әзерләргә икән дип киңәш сорады», ди ул. 

Абыйсы югалгач та хатын хафаланмавын искә ала. Аның кызы бала тудыру йортында булган, үз мәшәкатьләре белән туганы турында онытып җибәргән. Соңрак хатынга абыйсының күршесе шалтырата һәм Әнәс яшәгән фатирга полициянең килүен хәбәр итә. «Әнәс юкка чыккан. Аны эзлиләр», диде ул.

Ир-ат сменасына чыкмагач, эшендәгеләр чаң суга. Шуннан соң начальнигы Беляевның аерылышу алдыннан нишләптер: «Күрешербез, Алла кушса» - дип әйткән соңгы сүзен исенә. Нидер сизгән күрәсең. Полиция хезмәткәрләре белән берлектә, Әнәс Беляевның сеңлесе дә туганының бүлмәсенә керә.

"Моңа кадәр мин аның тулай торагындагы бүлмәсендә булганым юк иде. Гадәттә аның белән әнием фатирында очраша идек. Шуңа күрә ниндидер әйберләренең югалуы турында өздереп әйтә алмыйм. Әмма бүлмәдә абыйның шарфы эленеп тора иде. Ни өчен аны кимәгәненә гаҗәпләндем", - дип билгеләп үтте хатын.

Әнәс Беляевның юкка чыгуына ике ел булгач, ирне кабат эзли башлыйлар. Чаллының эзләү отряды волонтерлары Беляевны эзләү турында белдерүне гел яңартып тора. Ирнең апасы хәтта  ярдәм сорап күрәзәчегә мөрәҗәгать иткән. Ә ул исә туганыңны Боровецк урманында, су янында эзләргә кирәк, дип кайтара.

«Без анда эзләргә бардык. Һәр агач төбен, һәр чүплекне карадык. Мәетен булса да табарга теләдек. Боровецкий күпере астында мәетенең калдыклары яшерелгәнен полиция хәбәр иткәч, без шаккаттык. Бу хәл һаман да башка сыймый», - ди хатын. Аның әйтүенчә, улының фаҗигале төстә һәлак булуы турында олы яшьтәге әниләре әлегә кадәр белми. Каядыр эшкә киткән дип саный икән. 

 "Челнинские известия" басмасы хәбәр итүенчә, җинаять эше 2022 елда кузгатылган. Тикшерү кысаларында хәтта Әнәс Беляевның туган авылы янындагы сулыкны да тикшергәннәр. Аның белән аралашкан һәркемнән сорау алынган. 

Хәзер җинаять эше Чаллының тикшерү бүлегендә, гаепләнүченең җинаять кылу мотивлары аныклана.