Ләйсән Сафина: «Бездә дә шундый хәлләр барган вакытта, читтә яшәүче татарларга телне өйрәтү ничек авыр икәнен аңлыйсыздыр»

– Без яшьләрне ел әйләнәсендә күзәтеп киләбез. Алар безнең мәктәптә катнашырга лаеклымы, дип сыныйбыз. Әйтик, үзләрен социаль челтәрләрдә ямьсез тоткан, үз битендә мода шаукымы дип төрле начар сүзләр урнаштырган яшьләргә безгә юл ябык. Без хәтта шуның өчен әти-әниләренә кисәтү ясыйбыз, – ди “Идел” яшьләр үзәге директоры Ләйсән Сафина.

Яшь лидерлар Г.Камал исемендәге Татар дәүләт академия театрында спектакльләр, «Мир» кинотеатрында татарча фильмнар караячак. Ләкин яшьләр ял итәр өчен генә җыелмый Казанга. Алар үз төбәкләрендә тормышка ашырылган проектларын тәкъдим итәчәк. Төрле лекцияләр тыңлаячак, гамәли дәресләр, түгәрәк өстәлләр, диспутларда катнашачак, татар интеллигенциясе вәкилләре белән очрашачак.

Ел саен теләге булган барлык яшьләрне дә лидерлар мәктәбенә җыеп булмый. Шуңа да хәзер Әстерхан, Ульяновск өлкәләре, Новосибирск шәһәре, Казахстан республикасы Татар балалары лидерлар мәктәбен үзләрендә оештыра башлаган.
Ләйсән Сафина сүзләренчә, читтә яшәүче татарларга телне өйрәтү авыр бирелә.

– Сигез көн эчендә генә татар теленә өйрәтеп булмый. Ләкин без аларга сез татарча сөйләшә белергә тиеш, дип һәрвакыт кабатлап торабыз. Үзебездә дә шундый хәлләр барган вакытта, читтә яшәүче татарларга телне өйрәтү ничек авыр икәнен аңлыйсыздыр, – ди ул.
Федераль татар милли-мәдәни мохтарияте аппараты җитәкчесе Миләүшә Шәрәпова исә татар телен өйрәтә алмасак та, без яшьләрдә кызыксыну уята алабыз ди.
– Свердловск өлкәсеннән килгән яшьләр татарча җырларга, милли костюмнар кияргә ояла иде. Безгә килгәч, Казан урамнары буйлап милли киемнәрдән татарча җырлап йөрделәр, – ди Миләүшә Шәрәпова.

Лидерлар мәктәбендә Россиянең төрле регионнарында һәм чит илләрдә яшәүче, иҗтимагый, мәдәни тормышта кайнаучы 60 активист катнашачак. "Мәктәп"тә "Милләтебез хәзинәләре" профиль сменасында үзен актив күрсәткән яшьләр дә чакырылган.

Чараның максаты – татар яшьләре оешмаларында һәм берләшмәләрендәге актив татар балаларын барлау, аларга ярдәм итү. Шулай ук күпләп татарлар яши торган төбәкләрдә татар балалары белән эшләү өчен аерым үзәкләштерелгән тармак булдыру. Ул лидер-балаларда милли үзаң тәрбияләү, халыкның гореф-гадәтләре һәм телен тирәнтен өйрәнүгә юнәлдерелгән.

Фото: Татар-информ