"Немец солдаты ролен уйнаучыларга халык йодрык белән ташлана"

18-20 июньдә Питрәч районы Әлбәден авылында “Хәрби уеннар” фестивале узачак. 

Чараның 100 кеше яшәүче Әлбәден авылында үткәрелүе юкка түгел. Бу – Брест крепостенең легендар яклаучысы майор Петр Гавриловның туган ягы. Авыл халкы да бу бәйрәмне нәкъ шушы авылда үткәрүне хуплаган. “Фестивальне беренче тапкыр оештырганда ук авыл халкы килеп рәхмәт әйтте. Өлкән яшьтәгеләр Гаврилов белән бәйле истәлекләре белән уртаклашты”, - ди фестивальнең сценарий авторы, ТР Милли музей хезмәткәре Владислав Хабаров.

“Беренче тапкыр фестиваль моннан өч ел элек үткәрелде. Без аны иганәчеләр биргән 500 мең сумга оештырдык. Хәзер, әлбәттә, бюджет та, чыгымнар да зуррак. Әлеге фестиваль белән якташыбыз Петр Гавриловның истәлеген мәңгеләштерергә телибез. Брест крепосте Беларусь Республикасында урнашкан. Әмма ул шәһәргә барырга һәркемнең дә мөмкинлеге юк. Шуңа да без тарихи вакыйгаларны үзебездә чагылдырырга булдык”, - ди Питрәч районы башкарма комитеты җитәкчесе Альберт Хәбибуллин. Аның әйтүенчә, быелгы фестивальгә 10 меңләп кунак килер дип көтелә.

Тамашачы биредә реаль вакыйгаларга нигезләнгән сугыш күренешләрен карый алачак. Оештыручылар фикеренчә, гадәттә, моны халык хискә бирелеп елый-елый карый. “Тамашадан соң бөтен кеше немец солдатларын уйнаучыларга нәфрәт кичерә, кыйнарга үрелә башлый, йодрык белән ташлана. Шуңа да немец кешесе ролен башкарырга теләүчеләрне табу авыррак”, - ди Альберт Хәбибуллин.

Фестивальдә Россия һәм Беларусь Республикасыннан 250дән артык реконструктор катнашыр дип көтелә. 30 берәмлек хәрби техника һәм авиация тәкъдим ителәчәк.

Кунакларны бик күп кызыклы чаралар көтә. Сугыш еллары техникасы күргәзмәсе, 40нчы еллар биюләренә, штык сугышына һәм пычаклар ыргытуга өйрәтү, уникаль музей экспозициясе булган кыр госпитале, Винтаж фотосалоны һәм башка бик күп нәрсәләр оештырылачак. 

Кунаклар өчен Бөек Ватан сугышы чорындагы корал макетларыннан атарга мөмкин булган тир җиһазландырылачак. Балалар өчен мастер-класслар һәм тематик уеннар белән махсус мәйданчык булачак. Солдат боткасы, фудкорт, сувенир лавкалары, яшәү өчен глэмпинг әзерләнәчәк. 

“Брест крепосте. Бәреп керү” күренеше 20 июнь көнне 11.00-12.00 сәгатьтә, ә 1944 ел күренешләре 16.00-17.00 сәгатьтә тәкъдим ителәчәк. Фестиваль 21.00 сәгатьтә салют белән тәмамланачак.