Вакчыллык түгел, сакчыллык: буш шешәләрне кабат җыя башлаячаклар

Фильтр аша узса да, краннан салкын су эчүгә караганда, кибеттә шешәдәгесе шифалырак, файдалырак дип күпләп алып куябыз. Пыяла шешәдәгеләрендә пластикка караганда су да сыйфатлырак сак­лана. Тик менә бушаган шешәләрне генә кая куярга? Кибеттә җыймыйлар, ташларга кызганыч.

Элек ул шешәләр балаларның беренче хезмәт хакы иде бит. Урамда очраган яки үзебездә лимонадтан бушаган шешәләрне тиз генә кибеткә илтеп тапшырып, шул акчага берәр төрле тәм-том алып кайтып, өйдәгеләрне дә сыйлый идек. Күңелгә бик рәхәт була иде ул чакта – гаиләгә синең дә файдаң тия ич! Кулга кергән беренче акча – мал чыганагы иде ул шешәләр. Хәтерем ялгышмаса, бер шешә 12 тиен тора иде. Ике шешә тапшырып, 21 тиенлек бер кап җиләкле вафли алырга була иде.

Шешә тапшыруны бүгенге замана кешесе вакчыллыкка саный бугай. СССР калдыгы диделәрме икән, соңгы елларда шешә җыймыйлар. ­Пенсия акчасын чутлап, көчкә очын-очка ялгап яшәгән карт-карчыклар өчен дә өстәмә табыш чыганагы булыр иде ул шешәләр. Тирә-якны пычратып, теләсә кайда чүп-чар булып аунап та ятмаслар иде. Күбесен икенчел чимал буларак та файдаланырга була. Ә бит алар өр-яңа, авызлары да кителмәгән. Шифалы судан бушап калган шешәләрне күргәч, әнә шуларны уйлыйм. Шешәләр бер капчык булып килә инде.
Баксаң,шешәләр җыеп тапшыруны кире кайтарырга уйлыйлар икән бит. Мондый эшлекле тәкъдим белән «Гадел Россия» фракциясе җитәкчесе урынбасары Олег Нилов чыккан. Бу гамәл кабаттан эшкәртергә мөмкин булган чүп-чарны җыю культурасына өйрәтергә тиеш. Күп илләрдә чүпнең 80 проценты яңадан эшкәртелә.

Россиянең Премьер-министры Дмитрий Медведев пластик һәм пыя­ла шешәләрне махсус урнаштыру тәртибен кайтарырга кушкан. Россия Табигать байлыклары һәм экология министрлыгы, Сәнәгать һәм сәүдә министрлыгы, Икътисад үсеше министрлыгы, бу мәсьәләне өйрәнеп, Дәүләт Думасына тәкъдим әзерләргә тиеш.
2019 елның азагында шешәләр кабул итү пунктлары эшли башлар, мөгаен. Бер шешә 5-7 сум торыр дип фаразлана. Премьер-министр урынбасары Александр Жуков имзалаган башлангыч проектта хәбәр ителгәнчә, аларны азык-төлек кибетләре җыярга тиеш булачак.

Надия Шәйхетдинова, Казан:

– Бу хәбәрне шатланып кабул иттем. Беренчедән, экологик яктан файдалы гамәл. Алайса аяк басар урын калмады – кая карама шешә ауный. Пластиклары бигрәк тә зыянлы бит әле аның. Элек кардан җир ачылгач умырзаялар чыкса, хәзер корсакларын ялтыртып шешәләр чыга. Кулына тоткан шешәсен ташлар алдыннан кеше «Бу бит акча!» дип уйларга өйрәнсә, тирә-ягыбыз күпкә чистарыр иде. Аннары малның кадерен белергә балаларны да кечкенәдән өйрәтергә кирәк. Әзергә бәзер яшәп ятучы замана балаларын бигрәк тә. Тәрбия ягыннан да файдасы булыр дим.

Лилия Яруллина, Әтнә районы Дусым авылы, кибетче:

– Мин риза. Теләсә кайда аунап йөргәнче, җыелып тапшырылса, әйбәтрәк бит инде. Кешегә бераз файдасы да булыр иде. Тиеннәрдән сумнар җыела. Аз булса да, керем. Дөрес, шешә җыю башлангач, безгә эш артыр инде артуын. Ләкин тирә-юнебезнең чисталыгы өчен андый гына эш безне куркытмый.