Соңгы арада социаль челтәрдә физик яктан мөмкинлеге чикле мөлаем гына бер кызчыкның җырлаган видеолары еш күренә башлады. Баксаң, бу җырчы кыз үзебезнең Чаллы шәһәреннән Вероника Лазарева икән.
Аңа 22 яшь. Бүген әнисе һәм энесе белән яши. Кызганыч, ике ел элек әтиләре гүр иясе булган. Кыз тумыштан инвалид. Аның аяк-кулының түбән очлыклары юк.
Язмышына кыз һич кенә дә үпкәләми. “Элек протез белән дә йөргәнем булды. Шул фотоларны күреп, социаль челтәрдә бер белмәгән кешеләр дә сиңа кул, аяклар килешми икән бит, дип язалар иде. Сәер яңгыраса да, мин бу сүзләргә үпкәләмим. Димәк, мине ничек бар, шулай кабул итәләр. Димәк, алар минем кимчелегемне сизмиләр дә”, – ди Вероника.
Кул, аяклары башкаларныкы кебек булмаса да, кыз тормышка яраклашкан. Барысын да мөстәкыйль эшли. Алай гына да түгел, синтезаторда да уйнарга өйрәнгән әле ул. Бик моңлы итеп җырлый. Былтыр үзе көйләр, шигырьләр иҗат итә башлаган. Вокал буенча ике укытучы белән шөгыльләнә. Бик күп концертларда, бәйгеләрдә, хәйрия акцияләрендә катнаша.
– Игелек – ул һәр кешенең күңелендә, йөрәгендә. Яхшылык эшлә дә суга сал, диләр. Игелекле эшләрең өчен алмаш көтмәгәндә генә күңел канәгатьлек ала, – ди Вероника. Ел саен диярлек кыз физик мөмкинлекләре чикле хатын-кызлар арасында уздырыла торган “Татарстан энҗесе” бәйгесендә катнаша. 2016 елда җиңүче исеменә дә лаек булган.
“Хыялларым, шөкер, һәрчак тормышка ашып килә”, – ди кыз. Былтыр 4000 метр биеклектән парашют белән сикергән. Хәзер инде бернәрсә дә куркытмый”, – ди үзе елмаеп. Җанына рәхәтлек алыр өчен рәсем ясый. Бер ел бу өлкәдә укытучы белән шөгыльләнгән.
– Бәхетле булыр өчен юк кына нәрсәләргә дә сөенә белергә кирәк. Бары яраткан, күңел биреп эшләгән эш кенә уңышка илтә. Күбрәк елмаерга тырышыгыз. Яратыгыз, яратылып яшәгез. Йөрәгегез кушканча яшәгез. Үз үзегез булып кала белегез, – дип киңәшләрен бирде Вероника газета укучыларыбызга.
Иң мөһим һәм кызыклы язмаларны Татмедиа Telegram-каналында укыгыз
