Шәһри Казан

Зур саннарны күңелдән исәпләү методикасын уйлап тапкан Рифкать Гыймалтдинов: «Максатым – Гиннесс рекордлар китабына эләгү»

Казанда яшәүче пенсионер Рифкать Гыймалтдинов зур саннарны күңелдән исәпләү методикасын уйлап тапкан.

«Шәһри Казан» газетасы хәбәрчесенә сөйләвенчә, ул 1973 елда физика-математика факультетын тәмамлагач, бер ел мәктәптә укыткан. Аннан соң спорт өлкәсе белән бәйле төрле урыннарда эшләгән. Пенсиягә чыгар алдыннан исә торак хуҗалары ширкәтендә идарәче булып хезмәт иткән. Хәзер дә, 66 яшь булуына карамастан, актив яшәү рәвеше алып бара. Спорт һәм бакчачылык белән шөгыльләнә, йорт ишегалдында чәчәкләр үстерә. Һәм менә өч ел элек ул берничә урынлы саннарның квадратын күңелдән исәпләү методикасын уйлап тапкан.
– Методика онытылмасын өчен һәрвакыт үзлегемнән шөгыльләнәм. Мин уйлап тапкан методиканы бөтен саннарга да кулланып була. Саннарны башымда берничә төрле ысул белән исәплим. Бу ачышны ике-өч ел элек ясаган идем, ләкин моңа кадәр беркемгә дә әйтмәдем, уңайлы вакыт җитүен көттем. Шулай да әлегә бу турыда барысын да тәфсилләп сөйлисем килми. Тиздән Мәскәүгә барып, патент алырга исәплим, – ди ул.

Реклама

Редакциягә килгәч тә дүрт, биш цифрдан торган саннарны күңелдән тапкырлап, үзенең махсус формуласы буенча исәпләп күрсәтте. Дөресен генә әйткәндә, гаҗәпләндерде. Без калькулятор белән исәпләгәнче, яңа танышыбыз дөрес җавапны әйтеп тә бирде.
Рифкать Гыймалтдиновның киләчәккә дә планнары зурдан. Патент алганнан соң, «Беренче канал»да күрсәтелә торган «Старше всех» тапшыруына барырга өмет баглый. Алай гына да түгел, барысы да уңышлы килеп чыкса, Гиннесс рекордлар китабына да керергә теләге бар.

Зөһрә Садыйкова

Нравится
Поделиться:
Реклама
Комментарии (0)
Осталось символов: