Татарстан Республикасы Президенты премиясе лауреатларына дипломнар тапшырылды

Гадәттәгечә тантаналы чара Татарстан Республикасы Иҗтимагый палатасы турында республика законы кабул ителгән көнне үткәрелә, бу исә иҗтимагый хәрәкәтне үстерүдә әлеге органның мөһим ролен ассызыклый.

«Конкурста иҗтимагый берләшмәләрнең шактый актив булуы шатлыклы, - дип ассызыклады Рөстәм Миңнеханов. - Барлык лауреатлар да җәмгыятькә хезмәтнең лаеклы үрнәге булып торалар һәм гражданлык җәмгыяте институтларын үстерүгә зур өлеш кертәләр. 2020 ел лауреатлары безнең җәмәгатьчелеккә яхшы таныш".

Шулай итеп, Илдар хәзрәт Баязитов актив хәйрия эше алып бара. "Ярдәм" фонды каршында ул Россиядә күрү, ишетү һәм ДЦП диагнозы белән инвалидлар өчен бердәнбер укыту-реабилитация үзәген булдырды, катлаулы чорда «Тормыш юлы» акциясен тормышка ашырды, аның кысаларында 99 мең мохтаҗ ярдәм алды.

Марат Ильясов - көчле рухлы кеше. Авариядән соң тулысынча параличланган булып, үзе эшләгән күнегүләр ярдәмендә аякка баса ала. Бүген бу авторлык методикалары мөмкинлекләре чикләнгән кешеләрне реабилитацияләүдә кулланыла.

Әхәт Юлашев 30 елдан артык СССР Кораллы Көчләрендә Ватанга хезмәт иткән. Хәзер мәктәп укучылары, кадетлар, яшьләр белән эшләүгә һәм егетләрне армия хезмәтенә әзерләүгә зур игътибар бирә; 2001 елдан бирле оешкан диярлек һәм ул җитәкләгән Татарстан Республикасы сугыш һәм хәрби хезмәт ветераннары (инвалидлары) иҗтимагый оешмасы Россия ветераннар берлеге составында иң яхшыларның берсе санала.

«Татарларның федераль милли-мәдәни автономиясе» иҗтимагый оешмасы татарлар күпләп яшәгән урыннарда татар халкының телен, мәдәниятен һәм традицияләрен саклап калуга һәм үстерүгә ярдәм итә; барлык халыклар арасында дуслык һәм үзара аңлашу кыйммәтләрен эзлекле рәвештә яклый.

"Татарстан Республикасы Рус милли-мәдәни берләшмәсе" төбәк иҗтимагый оешмасы рус мәдәниятен, рус телен һәм әдәбиятын үстерү өлкәсендә ресурс үзәге булып тора; рус фольклорын өйрәнү, саклау һәм үстерү буенча зур эш башкара.

Әлмәт муниципаль районы ветераннар (пенсионерлар) җирле иҗтимагый оешмасы республиканың көньяк-көнчыгышындагы ветераннар оешмалары өчен методик үзәк функциясен тәэмин итә.

«Чудодети» дәвалау педагогикасы үзәге автоном коммерцияле булмаган оешма дәвалау-педагогик тернәкләндерүнең иң алдынгы методларын кулланып, менталь тайпылышлар булган балаларны дәвалауны оештыра.

«НеЗаМи» хәйрия фонды күрмәүче балаларга музыка коралларында уйнарга өйрәнергә ярдәм итә; ноталарны Брайль шрифты белән нотага күчерү буенча Россиядә уникаль эш башкара.

«Сезнең тормышка ашырган проектлар зур иҗтимагый әһәмияткә ия, гражданлык активлыгы үрнәге булып тора. Сезне чын күңелдән лаеклы бүләкләр белән котлыйм һәм киләчәктә дә уңышлар телим», - диде Рөстәм Миңнеханов, чарада катнашучыларга мөрәҗәгать итеп.

ТР Президенты Матбугат хезмәте