#Язмыш 21 июнь 2022, 15:21

"Армиядән кайткан төнне мәңге онытасым юк"

21 июнь 2022, 15:21

Сезнең газетага аерылышу, хыянәт, гыйбрәтле хәлләр турында күп язалар. Ә мин сезгә үземнең бәхетле мәхәббәт тарихымны язарга телим. Яраткан ирем Илдус – язмышым бүләге. Без бер авылда үстек, бер мәктәптә укыдык. Беренче караштан ук бер-беребезгә гашыйк булдык дисәм, һич кенә дә арттыру булмас.

Скопировать ссылку

"Армиядән кайткан төнне мәңге онытасым юк"

Кичке уеннарда гел бергә булдык, көн дә өйгә озата кайтты. Ул башка кызларга күз дә салмады, миңа да бары тик ул гына кирәк иде.

Армиягә киткәч тә, көттем. Хезмәт итеп кайткан төнне мәңге онытасым юк. Таң атканчы серләштек. Илдуска саф кыз булып кияүгә чыктым. Әти-әниләребез дә дус-тату булды, безнең мөнәсәбәтләргә беркем дә каршы килмәде. Гаилә корып, авылда калырга булдык. Икебез дә мактаулы эштә хезмәт куйдык: мин мәктәптә укыттым, Илдус агроном булып эшләде.

Бүген өч балабыз, биш оныгыбыз бар, Аллаһка шөкер. Илдус белән мөнәсәбәтләребез 35 ел элек нинди ихлас, кайнар булган булса, бүген дә шулай. Мәхәббәт хисе бер дә сүнми, сүрелми. Бер-беребезне бик яратабыз, кадерлибез, хөрмәт итәбез. Аллаһы Тәгалә бәхетемне күпсенмәсен иде.

Наҗия Д.,
Яшел Үзән.

Кызыклы яңалыкларны күзәтеп бару өчен Т елеграмга кушылыгыз.