Шәүкәт Биктимеров, Гомәр Бәширов, Мөхәммәт Мәһдиев урамнары кайчан булыр?

Заманында җырларда җырланган туган якның түмгәкле болыннары әрәмәләргә күмелгән. Шуңа күрә ике араны асфальт буйлап, авыллар аша гына үтәргә туры килде.

Җәяү йөргәндә бөтен нәрсә күзгә ташлана. Нык үзгәргән хәзер авыллар. Яхшы якка, билгеле. Күрше Казаклар авылының да гомергә пычрак кипмәгән урамнары да матурайган. Аның Центральная дип язылган урамыннан атлыйм. Бер башыннан икенчесенә кадәр бер чакрым ара бардыр. Урамның кайсы үзәк булуы һәркемгә билгеле бит инде. Шунда берәр татар язучысының исеме табылмаган. Бераз киткәч, берничә йортлы урамга күз төште. Анысы бөек шагыйребез Габдулла Тукай исемен йөртә икән. Хәер, үзебезнең авылда да 9-10 йортлы урам сөекле шагыйребез исеме белән аталган. Аның каравы рус язучысы Максим Горький исеме иң зур урамга бирелгән.

Котлы Бөкәш авылында да иң озын урамнарының берсе Совет исемен йөртә. Хәер, кайсы гына районга барып кермә, анда Совет урамы каршы ала. Татар авылларына бирергә исем тапмаганнар, дип уйлап куясың. Казандагы урамнарга да күренекле шәхесләрнең исемнәрен бик саранланып кына бирәләр. Әле шушы арада гына интернетта, Алсу һәм Итил урамнары пәйда булды, дип язылган иде, сөендем.

Башкалабыз урамыннан барганда берәрсе Сара Садыйкова, Фатих Кәрим урамнарын сорасалар, кайда икәнен кем генә әйтә алыр икән. Үзәктән якын гына булуга карамастан, аны шул тирәдә яшәүчеләр генә белергә мөмкин. Аның каравы Декабристлар, Восстание, Ершов кебек урамнарны белмәгән кеше юк. Ул яктан Хөсәен Ямашев белән Фатих Әмирхан кебек шәхесләребезгә «бәхет елмайган». Зур урамнарга бирелгән аларның исемнәре.

Башкалабызда бер үк исемдәге урам булуы да буталчыклык тудыра. Бервакыт Азино ягындагы Магистраль - Юллар киселеше урамында яшәүче танышым, үзләренә читтән кайткан туганнары адресларын кешеләрдән сораша торгач, аларны Идел буе районындагы Магистраль урамына җибәрүләреннән зарланган иде. Кабатланган исемнәр кушканчы, милләтебезнең күренекле артистлары, язучылары да җитәрлек ләбаса. Шәүкәт Биктимеров, Азат Аббасов, Вера Минкина, Гомәр Бәширов, Мөхәммәт Мәһдиев кебек сәнгатебезгә һәм әдәбиятка өлеш керткән артистларның, язучыларның исемнәре дә мәңгеләштерелергә тиештер бит инде. Алар бүген дә халык күңелендә. Гомумән, күңелгә ятышлы исемнәр күрәсе килә. Татарстанда яшибез ләбаса.

^{Фото: www.kirpet.ru}