“СоТворение”: искене яңача яңгырашта
“СоТворение” фестивале дистә елдан соң кире кайтарыла. Бүген һәм иртәгә узачак музыкаль чарада казанлылар һәм шәһәр кунаклары һинд фольклоры һәм рус рогыннан алып, Кытай реггисына кадәр төрле музыка стильләре белән таныша алачак.
“СоТворение” фестивале дистә елдан соң кире кайтарыла. Бүген һәм иртәгә узачак музыкаль чарада казанлылар һәм шәһәр кунаклары һинд фольклоры һәм рус рогыннан алып, Кытай реггисына кадәр төрле музыка стильләре белән таныша алачак.
“Казан” гаилә үзәге янында тере тавышка 8 илдән 150гә якын артист чыгыш ясар дип көтелә.
— Казанда зур масштаблы бәйрәмнәр күп түгел иде. Нигездә, 30 августта республика көнен зурлап билгеләп үтә идек тә, шуның белән шул. Бүген вәзгыять төптән үзгәрде. Казанлылар һәм кунаклар кайчак кызыклы чараларның кайсысын сайларга белми. Көненә берничә чара билгеләнгән булырга мөмкин. Бу кинәт кенә килеп чыкмады, без моңа зур көч куйдык, - ди Казан мэры Илсур Метшин.
Казанда беренче тапкыр фестиваль мәйданчыгында 90,5 тонна авырлыктагы сигез мең элементтан торган ике сәхнә корылган. Бу артистларның өзлексез чыгышы өчен эшләнгән. Монда уникаль яктылык һәм тавыш җиһазлары урнаштырылган - ул тере тавыш мохитенә тулысынча чумарга мөмкинлек бирәчәк.
Мондый фестивальне әзерләү бик күп вакыт һәм ресурслар таләп итә, билгеле. Әмма мэр сүзләренчә, казанлылардан “СоТворение”ны кире кайтаруны сорап бик күп мөрәҗәгатьләр булган.
Дүрт ел рәттән - 2008 елдан алып 2011 елга кадәр башкалада уздырылган фестиваль Универсиададан соң туктатыла бит. Казан мэриясенең “Туризм һәм кунакчыллык индустриясе” илкүләм проекты кысаларында федераль грант отуы, чараны яңадан оештырырга мөмкинлек бирә.
Фестиваль исеме үзгәрешсез калса да, бүген инде ул элеккесен кабатламый, заман шартларына, яңа тенденцияләргә юнәлеш алып, ул башка төрле яңгыраш алачак. Казанлылар өчен бу үзләре белгән музыканталар чыгышлары белән ләззәтләнү генә түгел, моңа кадәр таныш булмаган башкаручылар, үзләре өчен ят булган музыканы ишетү мөмкинлеге дә.
Тамашачылар алдында "Кино" рок-төркеме, Петр Налич, The Hatters, Therr Maitz, Антоха МС, Алексей Архиповский, Найк Борзов, OYME, "Космонавтов нет", Хуун Хуур Ту чыгыш ясаячак. Шулай ук сәхнәгә Мали музыканты Vieux Farka Tour, Бразилиядән джаз-фанк башкаручы João Selva, Һиндстаннан Rehmat-e-Nusrat фольклор коллективы, афро-соул башкаручы Nomfusi, Армениядән дудукист һәм композитор Дживан Гаспарян-кече һәм башкалар чыгачак.
Фестиваль өчен татар телендә махсус музыкаль өлеш тә әзерләнгән. Яңа программаны Артур Исламов, Juna һәм Gauga тәкъдим итәчәк. Шулай ук Казан "The Road" рок мәктәбе шәкертләре чыгыш ясаячак. Фестивальне Валерий Марьянов һәм Гөлназ Сәфәрова алып барачак.
Комментарийлар