2024 елда Татарстанда IT-җинаятьләрдән килгән зыян 5,7 миллиардтан артып киткән

Татарстан буенча Эчке эшләр министры Дамир Садретдинов сүзләренчә, җинаятьчелек структурасы үзгәрә - IT-технологияләр кулланып кылынган җинаятьләрнең чагыштырма авырлыгы бер ел эчендә генә дә 48 проценттан 57 процентка кадәр арткан.

- Мошенниклык һәм банк карталарыннан акча урлау гына түгел, моңа наркотикларны законсыз тарату, компьютердагы мәгълүматларга "керү" һәм башкалар да керә. Икътисади яктан алга киткән регионнарда яшәүчеләр, беренче чиратта, җинаятьчел һөҗүм объектларына әверелә. Мондый җинаятьләр саны буенча республика Мәскәү, Санкт-Петербург һәм Ленинград өлкәсеннән, Краснодар краеннан кала, дүртенче урында.  Аерым гражданнар да, юридик затлар да зыян күрә. Гомуми зыян 5 миллиард 720 миллион сумнан артып китте, - диде ул җиденче чакырылыш Дәүләт Советының җиденче утырышында.

IT-җинаятьләр кылган кешеләрне ачыклау буенча без илдә әйдәп баручы позицияләрдә торабыз, Идел буе федераль округында -  беренче урында һәм тулаем Россия буенча икенче урында.
Дистанцион мошенниклар белән вазгыять шактый тотрыклыланган - аларның саны 2023 ел дәрәҗәсендә калган диярлек ( 2,4 процент), ә банк счетыннан урлау күләме 14 процентка кимегән.  
- Барлыгы 2445 шундый җинаять тикшерелде,  1611 кеше җинаять җаваплылыгына җәлеп ителде, аларның 138 е илнең башка төбәкләрендә тоткарланган, - диде докладчы.