Андрей Кондратьев: 13865 күзәтүче сайлауларның гаделлеген күзәтә

Шулай ук республика халкы Мәләкәс округы буенча Дәүләт Советы депутаты һәм 7,5 меңнән артык муниципаль берәмлек депутатлары өчен тавыш бирә. 

Үзәк сайлау комиссиясе рәисе Андрей Кондратьев искәртеп узганча, кандидатлар турындагы бар мәгълүматны Бердәм дәүләт хезмәтләре порталында "Минем сайлаулар" дигән бүлектә белергә мөмкин. Шулай ук "Кайнар линия" эшли. Әлегә ниндидер борчулы шалтыратулар юк, халык үз участогын, тавыш бирү вакытын  төгәлләштерә, диде ул. 

Барлык 2752 сайлау участогы да тантаналы рәвештә 7.00дә ачылды һәм хәзерге вакытта штатлы режимда эшли. Аларда 13865 күзәтүче сайлауларның гаделлеген күзәтә, шулай ук барлык сайлау нокталарына видеокамералар урнаштырылган. Бу юлы сайлаучыларга үз ярдәмен волонтерлар да күрсәтә. 

Андрей Кондратьев билгеләп үткәнчә, бу юлы тавыш бирү буенча хисаплар яңа системада - ГАС "Выборы" 2.0 системасында формалаштырыла. Бу яңа система һәм Татарстанлагы сайлауларда ул беренче тапкыр сынау уза. Барысы да ниндидер катлаулыкларсыз эшләр, дип ышанычын белдерде ул. 

Татарстанлылар актив рәвештә "Мобиль сайлаучы" сервисыннан файлаланган. Шул рәвешле 43 меңнән артык кеше үзенә уңайлы участокны сайлаган. Шулай ук Андрей Кондратьев өйдә тавыш бирү мөмкинлеге турында да искә төшерде. Җитди сәбәпләр аркасында сайлау участогына килә алмаучылар, 14.00гә участок сайлау комиссиясенә шалтыратып, өйдә тавыш бирү теләген белдерә ала. 

2025 елның 1 июленә булган мәгълүматлар буенча, Татарстанда сайлау хокукына 2 923 096 кеше ия.