Августтан россиялеләрне нинди үзгәрешләр көтә? Пенсияләр арта, салым хәбәрләре автомат килә башлый

Эшләүче пенсионерларның пенсияләре артачак, үзмәшгульләр беренче тапкыр хастаханә кәгазе буенча түләүләр алачак, ә салым хәбәрнамәләре «Дәүләт хезмәтләре» порталына автомат рәвештә килә башлаячак. Моннан тыш, маркировкасыз махсус киемнәрне сату тыела.

Августтан россиялеләр тормышында нәрсә үзгәрә?

Эшләүче пенсионерларның пенсияләре арта

1 августтан эшләүче пенсионерларның пенсияләре 2025 елда тупланган индивидуаль пенсия коэффициентлары нигезендә яңадан исәпләнәчәк. Өстәмә иң күбе өч пенсия коэффициенты күләмендә булачак, ягъни якынча 500 сумга кадәр тәшкил итәчәк.

Шулай ук августтан тупланма пенсияләр уртача 17,3 процентка, ә ашыгыч пенсия түләүләре 19,32 процентка арттырыла.

Үзмәшгульләргә – хастаханә буенча түләү

Августтан үзмәшгульләр дә вакытлыча хезмәткә яраксызлык буенча пособие ала башлый. Әмма бу мөмкинлектән ирекле социаль иминиятләштерү программасына алдан кушылган һәм тиешле иминият кертемнәрен түләгән кешеләр генә файдалана ала.

Түләү күләме иминият стажына һәм сайланган иминият суммасына бәйле булачак.

Маркировкасыз махсус кием сатылмый

1 августтан махсус эш киемнәрен һәм шәхси саклану чараларын DataMatrix маркировкасыннан башка сату тыела.

Бу таләп утка чыдам киемнәргә, саклагыч перчаткаларга, каскаларга, коткару жилетларына һәм башка махсус саклану чараларына кагыла.

Кагыйдәне бозучыларга штраф салыначак. Юридик затлар өчен ул 300 мең сумга кадәр җитәргә мөмкин. Маркировкасыз товарлар конфискацияләнәчәк.

Салым хәбәрләре автомат рәвештә киләчәк

Августтан башлап салым хәбәрнамәләре «Дәүләт хезмәтләре» порталындагы шәхси кабинетка автомат рәвештә җибәреләчәк. Моның өчен аерым ризалык бирү кирәк булмаячак.

Шулай да теләгән кеше электрон хәбәрләрдән баш тарта ала. Моның өчен портал аша махсус гариза тапшыру җитә.

Әлеге яңалык транспорт, җир һәм милек салымнары, шулай ук башка кайбер салымнар турында хәбәрләрне вакытында алуны җиңеләйтергә тиеш.