Башка шәхесләр исеменә тап төшерү күңелне борчый

Танылмаганнары күренекле туганнары исеме белән "дан" яулый һәм шәхси тормышы турында телевидениедән күрсәтергә дә уңайсызланмый.   

Узган атнада телевидениенең федераль каналында булган бер тапшыруда Татарстаннан Айсылу Чижевская–Мингалим үзенең никахлы ире Илнур Илдарханов белән килгән. Алып баручы Айсылуны Татарстанның һәм Россиянең халык артисты Ренат Ибраһимовның туганы һәм шагыйрь Рөстәм Мингалим кызы, дип таныштырды.

Аның әлеге студиядә тәүге тапкыр гына түгеллеген дә әйтте. Моннан өч ел элек, үзе тәрбиягә алган 22 яшьлек Данил Зарипов (Даниил Чижевский) белән язылышканнан соң, "яңалык"лары белән уртаклашырга килгән булганнар. Ул чакта да Айсылу егеттән 30 яшькә өлкәнрәк булуы белән шаккаттырган. Алар бүгенге көндә дә аерылышмаган. Данил 2 ел ярымга хөкем ителгән (колониядә). 

Айсылу Мамадыш районының Җәнлек совхозы бистәсеннән йорт сатып алган. Бүгенге көндә шунда үзеннән 20 яшькә яшьрәк булган Илнур белән бергә яшиләр. Хәзерге кияү егете, заманында үзем 4 ел укыган Тәберде Чаллысы (Балык Бистәсе районы) авылыннан булып чыкты. Алып баручы да, үзләре дә Илнурны герой-шагыйрь Муса Җәлилнең туганы, – дип игълан иткәч, аптырап калдым.

Кемнең дә булса, шундый күренекле шәхес белән бәйләнеше бар икән, бөтен авыл халкы, укытучылар белә, югыйсә. Әби-бабалары Оренбур якларыннан килеп төпләнгән кешеләрме икән әллә, – дигән уй белән, гомер буе Тәберде Чаллы  мәктәбендә эшләгән укытучы Халидә апа Сибгатуллинага шалтыраттым. 

–Бу хәбәр безнең авылдашларны аптырашта калдырды. Илнурның әби-бабалары, нәселләре Тәберде Чаллысыннан. Әнисе дә үзебезнең районныкы. Аларның Оренбур белән бернинди бәйләнешләре юк. Россия каналыннан ничек шундый хәбәр таратырга була?

Укытучы-тәрбияче булып эшләгән Нәкыя Хәйруллинадан да шундый сүзләр ишеттем. 
 –  Миллионнарча кеше караган Мәскәү телевидениесеннән ничек шундый сүзне әйтергә кирәк?!Нәсел шәҗәрәсен белсә, Илнур андый сүзне әйтмәс иде.  

Әйе, туганнарыңны, нәселеңне белү бик мөһим, әлбәттә. Әмма башка шәхесләр исеменә тап төшерү күңелне борчый. Айсылу исә әхлаксызлык белән түгел, нинди дә булса уңышларга ирешеп, үзенең туганнары исеме белән горурланса икән. Шул чагында милләттәшләр дә горурланыр иде.

Люция Галимҗанова.