Бәхетле айфон иясе: «Гомеремдә бер тапкыр да бернәрсә дә отканым юк иде...»

#ВсейСемьейНаВыборы #ТатарстанАлга фотоконкурсының тагын бер җиңүчесе - Ләлә Дәминова. iPhone 16 иясеннән иң беренче булып сөенчене "Шәһри Казан" газетасы алды. Ләлә апа Кама Тамагы районының Иске Казиле авылында яши. Тумышы белән шул ук районның Олы Кариле авылыннан. Пенсиягә чыккач, тормыш иптәше белән Әлхәт абыйның туган нигезенә кайтып төпләнгәннәр. 
«Айфон оттыгыз» дип хәбәр иткәч, Ләлә апа югалып та калды. 
"Гомеремдә бер тапкыр да бернәрсә дә отканым юк иде. Бу юлы да андый өмет булмады. Әмма нишләптер без дә фотобәйгедә катнашырга булдык", - ди ул. Ә менә сайлауларны бер дә калдырмыйлар. "Электән үк без аны бер бәйрәм кебек кабул итәбез. Бер мәртәбә дә бармый калганыбыз юк", - ди айфон иясе.