Болгар академиясендә укучыларның 54 проценты – татарлар

Ачылган вакытыннан бирле уку йортын барысы 116 магистр, 25 доктор, 30 теология магистры тәмамлаган. 
– Белем алучыларның географиясе елдан-ел арта бара. 2025 елда илнең 23 төбәгеннән килделәр. Аларның иң күп өлешен Идел буе төбәкләре һәм СНГ илләре: Үзбәкстан, Казахстан, Таҗикстан һәм Төрекмәнстан алып тора, – дип билгеләп үтте Болгар ислам академиясе ректоры Фәрхәт Хөснетдинов матбугат очрашуында.

Спикер сүзләренчә, академия шәкертләре махсус хәрби операция зонасына гуманитар миссия белән дә еш йөриләр. “Рухи миссияләре аеруча мөһим. Докторларыбызның күбесе алгы сызыкта полк имамнары вазифасын үтиләр. Шулай илнең яңа төбәкләрендә дә төп постларны алып торалар”, – диде ул. 

Болгар ислам академиясе дини оешмалар белән актив хезмәттәшлек итә. Бүген уку йортының 46 дини оешма белән килешүе бар. 24есе – халыкара дәрәҗәдәгеләр. Узган елның августында академия өчен зур вакыйга булган: Россия Мәгариф һәм фән министры Валерий Фальков һәм Татарстан Рәисе Рөстәм Миңнеханов катнашында Мисырның 1200 еллык тарихы булган “Әл-Әзхәр” университеты белән меморандум төзелгән. Күптән түгел әлеге уку йортында магистратура һәм аспирантурада укучылар Каһирәдә квалификация күтәрү стажировкасында булып кайтканнар. Болгар академиясенә Катар, Бахрейн, Марокко, Согуд Гарәбстаны, Һиндстан, Кыргызстан, Казахстан һәм Үзбәкстан вәкилләре булып киткән.   
Академиядә даими рәвештә алты гарәп мөгаллиме эшли даими нигездә яши һәм эшли. Сүз уңаеннан: академиядә уку фәкать гарәп телендә алып барыла. 

Спикер билгеләп үткәнчә, бүген шәкертләр арасында татарлар 54 процентны алып тора. Татарстаннан кала Башкортстан, Пенза һәм Мордовиядән укучылар күп. 

Болгар академиясенең мәгариф эшчәнлеге буенча проректоры Рөстәм Гыйльметдинов әйтүенчә, академиядә укырга теләүчеләр күп, әмма барысын да кабул итә алмыйлар, чөнки абитуриентларга таләпләр бик югары. “Укуга ихтыяҗ сизелә, безгә узган ел өч мөфти укырга керде. Шулай ук академияне тәмамлаучы бер шәкертебез мөфти итеп билгеләнде. Болар безнең уку йортының бер күрсәткече”, – диде ул.  

Академиядә бүген өч үзәк эшләп килә. Тиздән дүртенче – Коръән тикшеренүләре үзәге ачылыр дип көтелә. “Аның белән билгеле галим – Ислам хәзрәт Зарипов җитәкчелек итәчәк. Үзәккә мөселман уку йортларының иң яхшы белгечләре җәлеп ителәчәк”, – диде академиянең фәнни эшчәнлек буенча проректоры вазифаларын башкаручы Айнур Солтанов.