“Бу рейтингка теләсә кайсы татар эләгергә тырышадыр”

Җиңүчеләрне 3 декабрьдә Казан Кремлендә «Миллиард.Татар» махсус тантанасында бүләкләячәкләр.
«Миллиард.Татар» басмасы баш мөхәррире Арслан Минвәлиев ассызыклап үткәнчә, әлеге бәйге 2023 елдан бирле уздырыла. 

– Аныңча, рейтинг төзүнең төрле методикасын өйрәндек һәм тавыш бирү юлы белән алып барырга булдык. Иң беренче итеп номинацияләр исемлеген төзибез. Шуннан соң экспертларга анкеталар җибәреп, һәр номинациягә үз өлкәләрендә иң күп өлеш керткән унар кешене билгеләүләрен сорыйбыз. Баллар куелгач, шорт-лист барлыкка килә һәм тавыш бирүгә куябыз. Үз исемнәрен исемлектә күрүчеләр сөенечләрен яшермиләр. Монда алар үзләрен тәкъдим итә алмыйлар. Аларны, әйткәнемчә, экспертлар билгели. Шуның өчен үзләренә күрсәтелгән игътибар алар өчен бик мөһим, – дип сөйләде ул журналистларга.
“Татмедиа” акционерлык җәмгыяте генераль директоры Шамил Садыйков, әлеге рейтингның максаты – тарихыбыз һәм мәдәниятебезгә карата кызыксындыру уяту, аларны популярлаштыру, дип белдерде. “Теләсә кайсы татар кешесе бу рейтингка эләгергә тырышадыр. Анда һәрчак лаеклы кешеләр урын ала һәм тавыш бирүнең нәтиҗәләреннән бөтен кеше дә канәгать кала”, – диде ул. 

Узган ел «Миллиард.Татар» редакциясе сайлап алган җиңүчеләр арасында булган тарих фәннәре докторы Искәндәр Гыйләҗев тә бар иде журналистлар белән очрашуда. Тарихчы фикеренчә, «Миллиард.Татар» бик зур эш башкара. “Проект бик үзенчәлекле һәм кызыклы, ул телебезне, мәдәниятебезне, традицияләребезне популярлаштырырга мөмкинчелек бирә һәм монда ясалма сайлап алу юк, халык үзе тавыш бирә. Рейтингта җиңүчеләргә ул алга таба үсәргә стимул да бирә. Проект киләчәктә тагын да камилләшер, даирәсе киңәер дип өметләнәбез”, – диде ул.   

"Миллиард.Татар" рейтингында җиңүчеләрнең шорт-листы:
1. Ринат Фәхретдинов – UFC лигасында беренче татар көрәшчесе
2. Кукмара районының Мәчкәрә мәчете имам-хатыйбы Мөнир Йосыпов
3. Сызрань шәһәренең «Туган тел» татар мәдәни үзәге җитәкчесе Наил Йосыпов

4. Төмән шәһәренең татар теле һәм әдәбияты укытучысы Халидә 
5. «Tatar Ornament» зәркән бизәнү әйберләре бренды авторы Резедә Әглиуллова
6. Дизайнер Солтан Салиев
7. «Шаян ТВ» каналы башкарма директоры һәм  баш мөхәррире Рамилә Сәхәбетдинова
8. Чаллыдагы Гали Акыш исемендәге 84 нче лицей-интернат директоры Фирдүсә Әюпова 
9. Чиләбе татарларының милли-мәдәни автономиясе рәисе Виталий Бәдретдинов 
10. Сочида «Рәхәт» татар җәмгыятенә нигез салучы Андрей Алексеев