Казанның «Цифрлы атна«сы киләчәккә юл яра

• Казанда 29-31 октябрьләргә билгеләнелгән Kazan Digital Beek-2026 халыкара форумы үзенең эшен дәвам итә. «Казан Экспо» халыкара күргәзмәләр үзәге 76 илдән килгән 21,7 мең кеше белән электрон технологияләр дөньясында кайнап тора, диярсең.

30 октябрьдә түгәрәк өстәл утырышларында кибериминлек, мәдәниятта һәм медицинада цифрлы технологияләрне куллануны үстерү мәсьәләләре көн тәртибенә куелды. Форум кысаларындагы цифрлы технологияләр күргәзмәсендә Татарстан Фәннәр академиясе мәйданчыгында республика белгечләре үзләренең проектлары белән таныштыра. Татарстанда электрон системалар өчен төзелгән программалар республикада гына түгел, ә Россия төбәкләрендә дә файдаланыла, инде гарәп илләренә дә үтеп керә башлаган.

ТНВ форумда «КАРАУ» видеоплатформасы тәкъдим итте. Әлеге платформаны мәдәни мирасны саклаучы, тамашачыларга татар кинематографиясенә һәм архив чыганакларына керү мөмкинлеге бирүче «тылсымлы сандык» дип әйтеп буладыр, мөгаен.

— ТНВ зур цифрлы дөньяның бер өлешенә әверелә бара. Яңа буынга цифрлы сервислар, платформалар җиткерәбез. Сыйфатлы тапшыруларны заманча технологияләрдән башка әзерләү мөмкин түгел, — ди ТНВ генераль директоры Илшат Әминов.