Чүп ташлама, чәчәк утырт!

Гомумшәһәр өмәсе 19 апрельгә билгеләнде.

– Өмәнең төп урыны итеп Юдино бистәсендәге Изумрудное күле территориясе алынды. Уңай һава шартлары урнашу чистарту-төзекләндерү эшләренә гадәттәгедән алданрак керешү мөмкинлеге бирә, – диде шәһәр Башкарма комитеты җитәкчесе урынбасары Игорь Куляжев “эшлекле дүшәмбе” киңәшмәсендә.

Санитар икеайлыкның беренче этабында җыештыру эшләрен подрядчы оешмалар башкара. Алар алдында 2 мең чакрым юл челтәрен чистарту, 144 чакрым рәшәткәләрне һәм 48 мең юл билгеләрен юу, шулай ук паркларны һәм скверларны, җәяүлеләрнең җир асты һәм җир өсте юл кичүләрен тәртипкә китерү бурычы тора.

Бөек Ватан сугышында Җиңүнең 80 еллыгын бәйрәм итүгә әзерлек аерым игътибар үзәгенә куелган. Игорь Куляжев сөйләгәнчә, мемориаль комплекслар, хәрбиләр каберлекләре һәм истәлекле урыннар төзекләндерелә. Икеайлык кысаларындагы чараларда 200 меңнән артык казанлы, 4 меңнән артык предприятие һәм оешма катнашыр, дип көтелә. Өмәләр оештырганда эш кораллары һәм җыелган чүпне чыгару мәсьәләсендә казанлылар район хакимиятләренә, идарәче компанияләргә, Тышкы төзекләндерү комитетына мөрәҗәгать итә ала.

Татарстан башкаласы бюджетында табигатьне саклау чараларына быел 52 миллион сум  каралган. Бу финанс чыганагы 49 мең кубометр чүп-чарны бетерүгә дә юнәлтеләчәк. Казанда күп фатирлы йортларда яшәүчеләрнең үз ихтыярларында йорт янындагы кече бакчаларны җыештыруда катнашулары, соңрак чәчәкләр үстерүләре мактаулы күренеш. Шәһәр хакимияте предприятиеләрне һәм казанлыларны санитар икеайлыкта актив катнашырга чакыра.