Дагыстан ифтары: 700 кунак, гомрәгә 4 юллама

Авыз ачу мәҗлесенә кунак булып килгән Дагыстан мөфтияте рәисе Мурад Исмаилов билгеләп узганча, Изге Коръән китабында туганлык мөнәсәбәтләрен саклау, бер-беребезгә яхшы мөнәсәбәттә булу турында әйтелә. “Гомуми итеп алганда болар барысы да бердәмлек. Мондый ифтарлар, авыз ачу мәҗлесләре дә безнең бердәмлекне күрсәтә”, – дип ассызыклады ул.

Ифтарда катнашучыларны Дагыстанның Татарстандагы тулы вәкаләтле вәкиле Магомед Мөслимов та сәламләде. “Аллаһы Тәгалә тоткан уразаларыбызны һәм игелекле эшләребезне кабул итсен. Россия Президенты тарафыннан Халыклар бердәмлеге елы дип игълан ителгән 2026 елда без безнең белән бергә Россия үсешенә өлеш керткән һәм аны мөселманнар белән бергә махсус хәрби операциядә яклый торган башка конфессияләргә карата мөселманнарның иң яхшы сыйфатларын күрсәтү мөмкинлегенә ия. Кадерле туганнар, исламда язылганча, бер-берегезне игелекле гамәлләрдә һәм гамәлләрдә уздырырга тырышыйк", – диде ул.

Татарстан мөфтие урынбасары Ришат Хәмидуллин рамазан аеның фазыйләтләрен билгеләп, бу айда гыйбадәтләребезне, игелекле эшләрне арттырырга тырышабыз һәм аларны рамазан аенда гына түгел, калган айларда да шулай ук дәвам итсәк, диде. 

Алабуга районында Татарстан халыклары ассамблеясе вәкиллеге директоры Зөләйха Эмирбекова Дагестан вәкиллегенең мондый ифтарларны биш ел оештыруын билгеләп үтте. “Бу безнең өчен күрешү-сөйләшү, хәл белешү, элемтәләрне ныгыту мөмкинлеге дә. Ел да авыз ачу мәҗлесе шулай зурлап оештырыла”, – диде ул. 

Ифтарга җыелган кунаклар арасында гомрәгә дүрт юллама да уйнатылды. Авыз ачучылар шулай ук Дагестан халкының милли ризыклары катлы хинкалдан да авыз иттеләр.