Эшлекле сөйләшүдән соң, йөгерә-йөгерә крикет та уйнарга ярый

– Беренче мәртәбә оештырылган тулы күләмле форумда инвестицияләр һәм финанс, хезмәт базары, мәгариф һәм фән, цифрлы технологияләр, нефтехимия, авыл хуҗалыгы, кино индустриясе, медиа өлкә турында сөйләшүләр барачак. 20 килешү кабул итү ниятләнелә. Россия төбәкләреннән дә киләләр, – диде Татарстанның Инвестицион үсеш агентлыгы җитәкчесе Талия Миңнуллина “Татар-информ” мәгълүмат агентлыгында уздырылган матбугат конференциясендә.

 Форум кысаларында Казанның Үзәк стадионында 9 октябрьдә 10.00 сәгатьтә крикет буенча студентлар командаларының иптәшләрчә очрашуы үткәрелә. Уенны ачу тантанасында Һиндстанның Россиядәге Гадәттән тыш һәм Тулы вәкаләтле илчесе Винай Кумар да катнаша.

– Казандагы форум бик әһәмиятле. Без цифрлы технологияләр, медицина өлкәләрендә хезмәттәшлек итә алабыз. Фармацевтика тармагында үртак предприятиеләр дә оештырып булыр иде. Крикет уены Һиндстанда, шулай ук гарәп илләрендә бик популяр. Казанда булган  БРИКС саммитыннан соң Һиндстанда  Казан белән нык кызыксыналар, – диде “Татарстан Республикасы белән Һиндстан арасында элемтәләрне үстерү буенча үзәк” рәисе Иштиак Әхмәд Гилькар.

Крикет бәйгесе 2028 елда Лос-Анжелеста уздырылачак Олимпия уеннары программасына да кертелгән.

– Россия Президенты Владимир Путин илебездә чит илләр студентлары санын 300 меңнән 500 меңгә җиткерүне бурыч итеп куйды. Һиндстан һәм Африка илләреннән килүче студентларны истә тотып, “Россия крикет берлеге” оештырылды, – диде Татарстан Республикасы Дәүләт Советы депутаты, Татарстанның Спорт советы рәисе Марат Бариев.

Спорт министрлыгының мәгълүмат-аналитик тәэмин итү һәм халыкара эшчәнлек бүлеге җитәкчесе Игорь Головин белән Татарстанның крикет федерациясе президенты Эдуард Заһретдинов сөйләгәнчә, республикада спортның бу төре танылу ала бара. Россиядә хәзер 50 меңнән артык кеше крикет уйный.