Сәйдә Мөхәммәтҗанова Мәскәүдә калырга җыенмый: «Казанның җылылыгы миңа якынрак»

— Мәскәү кебек зур мегаполис сине ничек каршы алды? 

– Ничек кенә җылы кабул итте әле! Социаль челтәрләрдә бөтенләй таныш булмаган бик күп кеше миңа яза, ярдәм кулы суза башлады. «Әгәр Мәскәүдә берәр ярдәм кирәк булса, тартынмыйча яз», — дип теләктәшлек белдерәләр, хәтта шәһәрне күрсәтергә, экскурсияләр ясарга тәкъдим итүчеләр дә җитәрлек. Мәскәүдәге Татарлар штабы да читтә калмады — алар мине үзләренә кунакка чакырды. Алга таба Югары икътисад мәктәбе (ВШЭ) студентлары белән дә бик кызыклы очрашу үткәрү планлаштырыла. Шуңа күрә монда үземне ялгыз хис итмим, дип әйтә алам. Торак мәсьәләсенә килгәндә, танышларымда яшим.

– Мәскәүгә күчүеңнең сәбәбе нәрсәдә?

– Әйе, мин танылган продюсер Игор Матвиенко академиясенә укырга кердем. Иң куанычлысы — мин анда укыр өчен махсус грант оттым. Уку процессы миңа ошый, һәр дәрескә зур теләк белән йөрим. Укулар дүрт ай дәвам итәчәк. Дәресләр программасы бик бай: биредә без эстрада вокалы серләрен өйрәнәбез, хореография, сольфеджио, актерлык осталыгы буенча белемнәрне камилләштерәбез. Тиздән үз көйләребезне язарга да өйрәтәчәкләр. Гомумән алганда, бик эчтәлекле һәм кызыклы уку мохите бу. 

– Киләчәктә бөтенләйгә Мәскәүдә калырга планлаштырмыйсыңмы?