Фәрит Мөхәммәтшин: «Сайлаулар татарстанлылар өчен бәйрәм кебек...»

Казанның Вахитов районында Советлар Союзы Герое А.С. Умеркин исемендәге 116 нчы лицей базасында ачылган 43 нче сайлау участогына парламент җитәкчесе тормыш иптәше Луиза Әкрамовна белән килде.

«Агитация кампаниясе бик кызыклы һәм энергияле узды. Республика Рәисен сайлаулар буенча да, депутатлар корпусын, муниципаль берәмлекләрне сайлаулар буенча да, – дип билгеләп үтте Фәрит Мөхәммәтшин журналистлар белән аралашканда. – Республикада сайлауларда бөтен гаилә белән тавыш бирү күркәм традициягә әверелде. Татарстанлылар өчен бу бәйрәм кебек, чөнки сайлауларда күршеләре һәм дуслары белән очрашалар, аралашалар, лаеклы һәм ышанычлы кешеләр өчен тавыш бирәләр. Татарстанның күркәм традициясе, шулай булгач, сайлауларның уңышлы башланып китүе белән!».

Тавыш бирүдән соң Фәрит Мөхәммәтшин сайлаучылар һәм төрле сәяси партияләрдән булган күзәтүчеләр белән аралашты, аларга сайлаулардагы эшләре өчен рәхмәт белдерде һәм хәерле көн теләде.

Бүген республикада Татарстан Республикасы Рәисен сайлаулар, шулай ук җирле үзидарәнең вәкиллекле органнары депутатларын сайлаулар һәм 18 нче Мәләкәс округы буенча республика Дәүләт Советы депутатын өстәмә сайлаулар уза.

Исегезгә төшерәбез, сайлау участоклары бүген иртәнге җидедә ачылды һәм эш кичке сәгать сигезгә кадәр дәвам итәчәк. Республикада барлыгы 2752  сайлау участогы эшли.

ТР Дәүләт Советы матбугат хезмәте