Гаилә, мәхәббәт һәм тугрылык көне: Татарстанда күп балалы гаиләләргә нинди ярдәм күрсәтелә?

Әлеге дата заманында Муром шәһәре князе булган Петр белән княгиня Февронияне искә алу көненә бәйле.

Гаилә, мәхәббәт һәм тугрылык көненең символы – ромашка. Бу чәчәкнең сары боҗрасы гүя гаилә учагы, ә ак таҗлар – сабыйлар. Балалар – өйнең бизәге. Татарстанда күп балалы 667 гаилә исәпләнә, аларда 322 бала үсә. Россиядә 2026 елның мартына өченче, дүртенче һәм бишенче бала булып 75 мең бәби туган.

“Гаилә” илкүләм илкүләм проекты 2025 елдан 2030 елга кадәрге чорга исәпләнелгән. Ана капиталы да 2030 елга кадәр дәвам итә. Татарстанда 2026 елда “Гаилә” илкүләм проектын гамәлгә ашыруга 17,6 миллиард сум тотылачак. Әлеге акчадан күп балалы гаиләләргә дә ярдәм күрсәтелә.

1960-1970 елларда гаиләдә 7-8 бала уртача күрсәткеч иде. Кызганыч, бүген 1-2 бала белән чикләнәбез. Белгечләр әйтүенчә, илдә демография уңай чишелеш тапсын өчен, гаиләдә кимендә 3 бала булуы зарур. Яшь гаилә торак мәсьәләсендә, гомумән дә, борчылырга тиеш түгел, дип саныйм мин. Торак шартлары тудырылса, гаиләләр дә һәм балалар саны да сизелеп артыр иде. 

Шагыйрь Һади Такташ әйткәнчә, мәхәббәт ул үзе иске нәрсә, ләкин һәрбер йөрәк аны яңарта. Хисләре тапталган, өметләре җимерелгән кеше мең мәртәбә “мәхәббәт юк ул” дип әйтергә мөмкин. Тик шул ук кешене яңа мәхәббәт ялкынландырып тормышка кайтарачак, гаилә бәхетенә ирештерәчәк.

Тугрылык, дигәндә, бу сүзне ир белән хатын арасына гына кайтарып калдырырга кирәкмидер. Ватанына, халкына, хәрби антына, башкарган хезмәтенә тугры булмаган кеше гаиләдә дә тугры санала алмый. Гаилә – ил терәге. Тырыш, бердәм гаилә илгә лаеклы хезмәт өлеше кертә. Россия – төрле милләтләрнең уртак йорты. Шушы олы йортта традицион гаилә корып, яратып-яратылып, тугрылык саклап яшик!

Төп фотода хезмәттәшебез Лилия Заһидуллина гаиләсе белән