Газ торбасы бушлай сузып бирелә

2024 елдан башлап бушлай газүткәргеч инде коммерциячел булмаган бакчачылык ширкатьләренә дә сузып бирелә.

– Татарстанда җир кишәрлеге чигенә кадәр бушлай газүткәргеч сузарга 38 мең гариза керде. Исемлектәге 35 мең гариза буенча килешү төзелде. 31 мең җир кишәрлегенә кадәр газүткәргеч сузылды, инде 25 мең йорт газга тоташтырылды. Быел республикада 16 бакчачылык ширкатенә газүткәргеч сузарга керешәбез. Болар: Казан, Чаллы, Алабуга, Азнакай, Җәлил һәм башка шәһәрләр тирәләрендәге ширкатьләр, – диде “Газпром трансгаз Казань” җаваплылыгы чикләнгән җәмгыятьнең генераль директоры урынбасары Рөстәм Хамматов.

Татарстанның сәнәгать һәм сәүдә министры урынбасары Марат Миннебаев аңлатканча, бакчачылык ширкате инде газүткәргеч төзелгән торак пункт чикләренә урнашкан булырга тиеш.

– Җир кишәрлеге чигеннән эчке якта йортка газ кертеп, газ җиһазлары урнаштырган өчен ташламалы категория гражданнарга 100 мең сум субсидия бирелә. Газ җиһазларын сатып алу квитанцияләрен туплап бару кирәк, – диде Марат Миннебаев.

Росреестрның Татарстан буенча идарәсенең бүлек җитәкчесе Алсу Сафина искәрткәнчә, йорт яки бакча йорты, җир кишәрлеге Росреестрда теркәлгән булырга тиеш. Татарстанның бакчачылар берлеге идарәсе рәисе Илья Слесарский сүзләренә караганда, торак пунктлардан ерактарак урнашкан бакчачылык ширкатьләре дә күп.

– Бакчачылык ширкатьләрендә бушлай газүткәргеч сузу мөмкинлегеннән файдаланып калырга, документлаштыру эшләрен башкарырга кирәк, – диде Илья Слесарский.

Гаризаларны “Госуслуги” порталы аша, район газ хезмәтендә, МФЦда бирергә була.