«Геройлар йөгереше» Менделеевскида меңләгән кешене җыя: чит ил командалары да килә

Татарстанның Менделеевск шәһәрендә 25 июльдә “Геройлар йөгереше” (“Гонка Героев”) Бөтенроссия каршылыклар аша йөгерү бәйгесе оештырыла. Республика предприятиеләре һәм министрлыклары белән беррәттән старт сызыгына Мәскәү, Санкт-Петербург, Россия төбәкләре, БДБ илләре, Кытай, Һиндстан командалары да баса. Каршылыклар ясалган 6 һәм 12,5 чакрымлы ике трасса тәкъдим ителә. 
Командаларга старт 25 июльдә иртәнге 03.00 сәгатьтә бирелә, бәйге үзе дә “Таңнан кичкә кадәр” дип атала. Таңнан торып булмас, дип борчылмагыз. Спорт бәйрәме рәсми төстә 09.00 сәгатьтә ачыла.

– “Геройлар йөгереше”нә 2022 елда 5 мең кеше килгән иде, узган ел инде 13 мең кеше булды. М-7 автотрассасы буенча карап килдек, АЗСларда бензин сатыла, озын чиратлар юк. Рәхим итеп килегез! Ярышларда һәм уеннарда катнашыгыз. Туристлар өчен төн куну һәм ял шартлары тудырылды. Балалар өчен махсус уен мәйданчыклары була. Территориягә экспонат сыйфатында вертолет, локомотив, трамвай урнаштырылды,– диде Менделеевск районы хакимияте башлыгы Роберт Искәндәров. 

Менделеевск шәһәрендә үткәрелә торган “Геройлар йөгереше” 2025 елдан Бөтенроссия дәрәҗәсе алган һәм Россия Президенты Владимир Путин башлангычындагы “Демография” проектының “Спорт – тормыш нормасы” федераль проектына аваздаш.

– Спортны актив пропагандалаган өчен узган ел Россиянең триатлон федерациясе һәм “Лига Героев” автоном коммерциячел булмаган оешма җитәкчесе Ксения Шойгу тарафыннан 2 статуэтка белән бүләкләндек. Менделеевск шәһәрендәге “Геройлар йөгереше” спорт чарасы Россиядә иң колачлысы. Ярышлар да концерт та, сәүдә дә була, – диде “Аммоний” акционерлык җәмгыятенең генераль директоры урынбасары Юрий Разбежкин.

Татарстанның каршылыклар аша йөгерү федерациясе рәисе Андрей Модин сөйләгәнчә, 13.00-17.00 сәгатьләрдә 7-15 яшьләрдәге балалар өчен махсус бәйгеләр оештырыла. ГТО нормативларын да тапшырырга мөмкин.

“Ночные волки” Бөтенроссия мотоклубының Алабуга бүлеге җитәкчесе Денис Баурин әйткәнчә, спорт бәйрәмендә байкерлар да катнаша.

– 24 июльдә 18.00 сәгатьтә Менделеевск шәһәре урамнары буенча мотоциклларда узу була. Чарага мотоциклы булган башка кешеләр дә кушыла ала. Осталык дәресе дә бирәчәкбез, – диде Денис Баурин.

“Геройлар йөгереше”нең приз фонды 350 мең сум. Җиңүче командаларга 150-100-50 мең сум бирелә. Иң үзенчәлекле костюмнар кигән команда “костюм өчен” аерым 50 мең сум ота ала.