Һиндстан делегациясе Россиядәге газеталар өчен борчыла: сәбәбе нәрсәдә?

Аның кысаларында “Россия – Һиндстан: Медиа өлкәсендә стратегик хезмәттәшлек нигезләре” темасына фикер алышу булды. Россия, Татарстан һәм Һиндстан редакцияләре җитәкчеләрен, журналистларын “ТАТМЕДИА” республика матбугат һәм массакүләм коммуникацияләр буенча агентлыгы җитәкчесе Айдар Сәлимгәрәев сәламләде.
– Татарстан Россиянең нык үсеш алган төбәкләренең берсе. Бездә нефть, көчле сәнәгать, авыл хуҗалыгы, йөк машиналары, самолетлар һәм суднолар җитештерү, химия сәнәгате бар. Республика цифрлы технологияләргә күчүдә әйдаман. Татарстан зур Идел һәм Чулман елгалары кушылган урынга урнашкан. Республика көнбатыш белән көнчыгыш арасында үзенчәлекле күпер ролен үти, бу меңьеллык тарихка ия җир. Биредә татарлар, руслар һәм башка халыклар – 175 милләт вәкилләре гомер кичерә. Биредә православие белән ислам тынычлыкта яши, – диде Айдар Сәлимгәрәев.

Берләшкән Милләтләр Оешмасының Мәскәүдәге мәгълүмат үзәге директоры Владимир Кузнецов: ”Форум кунакчыл Казанда уза. Татарстан Республикасын БМО белән күпьеллык уңышлы хезмәттәшлек бәйли. Форумның нәтиҗәләргә ирешүен телим”, – дип, хат җибәргән.

Һиндстанның массакүләм мәгълүмат чаралары җитәкчеләре Ракеш Синха, Джанки Дэйв, Шуджа Уль Хак үзләренең чыгышларында Россия һәм Татарстан белән медиа өлкәсендә хезмәттәшлекне үстерүне хупладылар, халыкның матбугатка ышанычының мөһимлеген искәрттеләр. Һиндстанның Россиядәге һәм БДБ илләрендәге массакүләм мәгълүмат чаралары төркеме җитәкчесе Девадаткан Надир исә, Россиядә басма матбугатның бетә баруына борчылуын да белдерде.
– Һиндстанда 1,5 миллиард кеше яши, газеталар миллионлаган данәдә бастырыла. Россиядә басма матбугатның бетә баруы күзәтелә. Һиндстан белән Татарстан арасында медиа өлкәсендә хезмәттәшлекне үстерү буенча “эшче төркем” оештырырга тәкъдим итәм, – диде Девадаткан Надир.

Фикер алышуда катнашучылар әлеге тәкъдимне хуплады.