Яңа ел бәйрәмнәрендә Казан кар эретү пунктларына 144 мең тоннадан артык кар китерелгән

Бу күрсәткеч узган ел белән чагыштырганда өч тапкыр диярлек күбрәк.

Иң күп кар Несмелов урамындагы станциягә китерелгән. Ул бәйрәм көннәрендә үз мөмкинлекләреннән артык күләмдә эшләгән: ун көн эчендә 19,6 мең тонна кар кабул иткән. Аеруча 6 гыйнварда эш күп булган – шул көнне генә дә 3 мең тоннадан артык кар тапшырылган.

Кар күләме зур булуга карамастан, барлык кар эретү пунктлары тәүлек буе, ялсыз һәм тәнәфессез эшләгән.

Белгечләр әйтүенчә, актив кар чистарту сезоны декабрь урталарында ук башланган. Шул вакыттан алып бүгенгә кадәр шәһәрдә 250 мең тоннадан артык кар эшкәртелгән. Хәзер барлык пунктларда да эш процессы автоматлаштырылган, техника исә электрон система аша теркәлә.

Бүгенге көндә Казанда 8 кар эретү станциясе эшли. Алар көненә якынча 8 мең тонна кар кабул итәргә сәләтле.