Яңа ел бәйрәмнәренең шатлыклы да һәм моңсу да булган кайтавазы

Татарстанда Яңа елны каршы алу һәм ял көннәрендәге чыршы бәйрәмнәрендә 1 миллионнан артык кеше катнашкан. Күп кенә чаралар 2026 ел – Татарстанда Хәрби батырлык һәм хезмәт фидакарьлеге елы шигарендә барган.

Программа дәвам итә

– Республика шәһәрләрендә һәм авылларында 8 мең 98 чара оештырылды. “Беренчеләр хәрәкәте” яшьләре активлык күрсәтте. Алар 39 муниципаль районда 150 чара үткәрде.  “Беренче чыршы” бәйрәмнәренә 900 кечкенә бала чакырылды. “Тылсымлы бияләй” акциясе кысаларында җылы кием-салымнар җыелып, мохтаҗ гаиләләрдәге балаларга тапшырылды. “Яңа ел тәрәзәләре” акциясе 13 муниципаль районны колачлады. Тәрәзәләргә бизәкләр ябыштырылды. Казанда мәктәп укучылары өчен инде 25нче мәртәбә Республика чыршы бәйрәме үткәрелде, аңа махсус хәрби операциядә катнашучыларның балалары да чакырылды. Татарстан Рәисе Рөстәм Миңнеханов укуда һәм җәмәгать эшләрендә актив катнашучы 4 укучы белән аерым очрашты. Кышкы “Күрше” фестивале һәм мәдәни-спорт чаралары дәвам итә, – диде Татарстан премьер-министры урынбасары Ләйлә Фазлыева Хөкүмәт йортында уздырылган брифингта.

Кышкы урман шифасы

Кышкы каникул вакытында республикада 7 мең бала сәламәтләндерү лагерьларында ял иткән.

– Тематик сменалар да оештырылды. Махсус хәрби операциядә катнашучыларның гаиләләреннән 346 балага лагерьларга юллама бирелде. “Созвездие-Йолдызлык” фестиваленең яшь артистлары махсус хәрби операциядә катнашкан кешеләргә һәм махсус хәрби операциядә катнашучыларның гаиләләренә концерт куйды, – диде Татарстанның яшьләр эшләре буенча министры Азат Кадыйров.

Бала бәла булмасын

Татарстанда кышкы каникул көннәрендә мәктәп укучылары өчен 2,5 мең мәдәни-спорт чарасы оештырылган.

– Республика чыршы бәйрәме бик күңелле булды. Кыш бабайдан 33 096 укучыга бүләкләр таратылды. Махсус хәрби операциядә катнашучыларның балаларына Татарстан Рәисе исеменнән дә Яңа ел бүләкләре тапшырылды. Каникул вакытында укучылар белән юл хәрәкәте иминлеге дәресләре үткәрелде. Кагыйдәләрне үтәү зарурлыгы, киемнәргә яктылык кайтара торган элементлар беркетүнең файдасы искәртелде. Ата-аналар балаларына юл хәрәкәте кагыйдәләрен гел аңлатып торсыннар, гомумән, балаларын күз уңыннан ычкындырмасыннар иде, – диде Татарстанның мәгариф һәм фән министры урынбасары Алсу Әсәдуллина.

Нурлы Казан, бөек Тукай

Татарстанның мәдәният министры урынбасары Дамир Натфуллин сөйләгәнчә, махсус хәрби операциядә катнашучыларның балаларына бушлай спектакльләр күрсәтелгән. Быел татар халкының бөек шагыйре Габдулла Тукайның тууына 140 ел тулу шигарендә мәдәни чаралар үткәрүгә керешелгән.

Казан шәһәр Башкарма комитеты җитәкчесе урынбасары Азат Абзалов сүзләренә караганда, башкалада 150 чыршы шәһәрчеге төзелгән, 105 шугалак, 14 чаңгы трассасы эшли.

– Казанга каникул вакытында 200 мең турист килде. Яңа елны 55 мең кеше “Казан” гаилә үзәге янындагы, шулай ук Черек күлдәге чыршы мәйданчыкларында каршылады, – диде Азат Абзалов.

Чыршыдан чыккан сөенеч

“Шәһри Казан” газетасы хәбәрчесе соравына җавап биреп, Ләйлә Фазлыева:”Татарстан Рәисе Рөстәм Миңнеханов матур гадәт буенча, балаларның чыршыга беркеткән “теләк хатларын” ала һәм теләкләрен үти. Татарстан Рәисе федераль чыршыдагы “теләк хатларын” да алды һәм андагы теләкләрне дә үтәде”, – диде. “Теләкләр чыршысы Казан мэриясенә дә куела. Шәһәр җитәкчелеге, шулай ук бизнес вәкилләре чыршыдагы хатларны алып, балаларның теләкләрен үтәде”, – диде Азат Абзалов. “ Яңа ел чыршысына балаларның теләкләрен беркетү Казанда гына түгел, республиканың башка шәһәрләрендә һәм районнарында да оештырыла.  Бу – матур гадәт, игелекле эш”, – диде Дамир Натфуллин.

Чыршыдамы гаеп?!.

Россия Гадәттән тыш хәлләр министрлыгының Татарстан буенча баш идарәсе җитәкчесе урынбасары Максим Трущин сөйләгәнчә, республикада Яңа ел бәйрәмнәре көннәрендә 116 янгын чыккан, 5 кешенең гомере өзелгән, 9 кеше төрле дәрәҗәдә тән пешүләре алган.

– Пиротехника белән саксыз эш йөртү аркасында 6 кеше зыян күрде. Алдагы көннәрдә 20 градус салкыннар көтелә. Кешеләр өйләрендәге мичләрне игътибардан ычкындырмасыннар, кечкенә балаларны өйдә ялгызларын гына калдырмасыннар, – дип искәртте Максим Трущин.

Мәгънәсез югалтулар

– Республикадагы 150 чыршы шәһәрчеге күзәтчелектә тотылды, җәмәгать тәртибен бозулар теркәлмәде. Яңа ел бәйрәмнәре көннәрендә юлларда 44 юл-транспорт авариясе килеп чыкты, аларда 4 кеше үлде, 76 кеше төрле авырлыктагы имгәнүләргә дучар булды. Кышкы юлларда хәрәкәт тизлеген арттыру, кагыйдәләрне сакламау фаҗигале тәмамланырга бик мөмкин, – дип кисәтте Татарстан буенча Эчке эшләр министрлыгының җәмәгать тәртибен саклау полициясе җитәкчесе урынбасары вазифасын вакытлыча башкаручы Евгений Прытков.