Йөгерәм дип чүт үлмәдем...

Организмның миннән үч алуы булды бугай анысы.

Спортчы кызым йөгермәскә, бары кызу адым белән генә йөрергә кушкан иде. Шушы ук киңәшне миңа Илнур Фәйзрахманов та, аннары тагын берничә кеше бирде. Мин кеше әйткәнне тыңлыйммыни? Имеш, кызу-кызу гына йөреп әле кайчан ябыгам, озакка китә. Аннары, иртән эшкә киткәнче 1,5 километрны узам дип максат куйган идем, йөгерсәң, аны тизрәк узасың бит инде... Уздым... Бер ун көнләп чаба алдыммы юкмы, организмда чактан гына катастрофа булмый калды, туктатырга туры килде.

Кәбестә... Чәйне тәм-том белән эчүне дә туктатабыз дип сөйләштек. Килешкәнчә, икенче көнне эшкә кәбестә-кишер төяп алып килдек. Бер генә көнгә җитте ул диета.

Белә идем бит инде кәбестәнең ашказанын авырттырасын. Ул кичне чактан гына «скорый» чакыртмый калдым. Ашказанының болай авыртуы туктаса, кәбестә ягына борылып та карамам дигән идем...

Җүләргә гыйбадәт кылырга кушсаң, маңгаен ярган, диләрме. Менә безнең дә шулайрак булды. Йөгерәм дип чүт үлмәдем, кәбестә ашап чак исән калдым...

Шунда ук Лилиягә бер язылучысы теләктәшлеген белдергән:

Лилия, юкка хафаланмагыз. Иң беренче, сәламәтлек кирәк. Минем бианай әйтә торган иде, ашый алганда ашагыз, бер генә вакыт ул, дип. Ул вакытта аның сүзләренә ышанмый идем, ә ул бик дөрес әйткән икән. Тазарып алу бер чорда булып ала да, уза икән ул. Берзаман, хак та артыгын ашый да алмый башлыйсың икән ул. Җәяү йөрү әйбәт шөгыль. Мин бот сөягемне сындырып, алты ай постельдә яттым, бөтен мускулларым атрофироваться итеп беткән иде. Минем аякка басып йөреп китүемә бөтен кеше шаккатты. Әкренләп табигатькә чыгып йөри башладым. Миннән дә бәхетле кеше юк иде. Миннән күреп, күп кенә авылдашлар урамда йөри башладылар. Авылда аңынчы урамда йөрүче юк иде. Кыш көннәрендә хәзер дә аяк асты таймаганда ишегалдында гына йөрим, таюдан бик куркам. Җәй айлары минеке инде. Ишегалдында да чакрымнар җыела ул, иренмичә йөрергә генә кирәк. Хәрәкәттә бәрәкәт, дип белми әйтмәгәннәр элеккеләр. Иң мөһиме – исәнлек шул.

Лилия Гәрәева
Фото: ru.freepik.com