Казан – Аэропорт маршруты яңара: Лаеш районында ике яңа тимер юл тукталышы барлыкка киләчәк

Алар Казан – Аэропорт маршруты буенча урнашачак һәм якындагы торак комплекслар белән сәнәгать предприятиеләренә җәмәгать транспортында барып җитүне җиңеләйтәчәк.

Бу хакта ТР Транспорт һәм юл хуҗалыгы министрлыгының матбугат хезмәте хәбәр итә.

Эш барышы белән Татарстанның транспорт һәм юл хуҗалыгы министры Фәрит Хәнифов һәм Горький тимер юлы башлыгы Сергей Дорофеевский танышты. Проект Татарстан Хөкүмәте белән берлектә тигез финанслау шартларында гамәлгә ашырыла.

Фәрит Хәнифов сүзләренчә, яңа платформалар Казан – Аэропорт – Казан маршруты буенча мөһим транспорт үзәкләренә әверелергә һәм пассажирларга уңайлы күчеп утыру мөмкинлеге тудырырга тиеш.

«Госархив» платформасын Столбище тукталышы белән Аэропорт станциясе арасында, ә «Тихорецкая»ны Каучукова урамында төзиячәкләр.

Сергей Дорофеевский мәгълүматларына караганда, хәзер әлеге юнәлештә елына якынча 400 мең пассажир йөри. 2030 елга бу күрсәткеч 650 меңгә җитәргә мөмкин.

Яңа платформаларда пассажирлар өчен навеслар, яктырту һәм куркынычсызлык системалары урнаштырылачак. Алар шулай ук хәрәкәт мөмкинлекләре чикләнгән кешеләр өчен дә җайлаштырылачак.

Исегезгә төшерәбез, «Госархив» һәм «Тихорецкая» платформаларын төзүне финанслау турында быел февральдә хәбәр ителгән иде. Әлеге тукталышларны булдыру планы исә 2024 елда ук Россия тимер юллары белән берлектә каралган. Моннан тыш, Казан аэропортына баручы маршрутта өченче платформа – «Маяк паркы»н төзү мөмкинлеге дә тикшерелгән иде.