Казан тәҗрибәсен чит илләр дә өйрәнә: Иске Татар бистәсе үрнәге дөньяны кызыксындыра!

Шәһәрләрне заманча үстерү һәм шул ук вакытта аларның тарихи йөзен саклап калу — бүгенге урбанистиканың иң мөһим һәм четерекле бурычларының берсе. Безнең Казаныбызда исә аның матур үрнәкләре бар. Шәһәр үзәгендәге Иске Татар бистәсе, тарихи һәм мәдәни мирасны саклап, заманча таләпләргә яраклаштырып яңартылды. Бүген ул шәһәр кунакларының иң яраткан урыны. «РЕБУС 2026» халыкара форумына багышланган матбугат очрашуында да спикерлар кат-кат шул хакта искәртте.

Республика территориясендә 13 тарихи җирлек бар

Аларның 11е — төбәк әһәмиятендәге — Казан, Биләр, Болгар, Бөгелмә, Буа, Лаеш, Мамадыш, Менделеевск, Минзәлә, Зөя һәм Тәтеш, ә 2се — федераль әһәмияттәге Чистай һәм Алабуга шәһәрләре. Саклана торган архитектура һәйкәлләренең 70 процентка якыны нәкъ менә шул җирлекләрдә тупланган.

«Бездә тарихи җирлекләр территорияләрендәге махсус объектларда төзүчеләр белән эшләү буенча уникаль тәҗрибә тупланды, һәм форум шул тәҗрибә белән уртаклашырга, шулай ук төп системалы мәсьәләләр, әйтик, инженерлык инфраструктурасын яңарту, инвесторлар җәлеп итү турында фикер алышырга мөмкинлек бирәчәк. », — диде Татарстанның төзелеш, архитектура һәм торак-коммуналь хуҗалык министры урынбасары Владимир Кудряшев.

«Тәҗрибә өйрәнәбез, әмма күчермәсен эшләмибез»

Чарага Төркия, Ирак, Иран илләреннән дә вәкилләр чакырулы. Татарстан Республикасы Рәисе ярдәмчесе Олеся Балтусова сүзләренчә, Россиянең тарихи җирлекләр белән идарә итү тәҗрибәсе, шул исәптән бу өлкәдәге законнар чит ил экспертларына да кызыклы.

— Кануннар Россиядә бер, әмма безнең барлык төбәкләрнең дә үз алымнары һәм үз тәҗрибәсе. Чит илләрнең үз кануннары һәм үз тәҗрибәләре. Аларның эш юнәлешләрен үзебез дә өйрәнәбез, тик күчермәсен эшләмибез. Әйтик, Баку тәҗрибәсе кызыклы дип табылып, үз вакытында аны Иске Татар бистәсендә кабатлап маташтык, әмма бездәге шартларда аны эшләргә кирәкмәвен аңладык һәм үз юлыбызны сайладык, — ди Олеся Балтусова.

Форумны оештыручылар 30 илнең тарихи җирлекләрен үстерүнең тәҗрибәсен өйрәнеп, һәрберсенең аерым махсус белешмәлеген эшләргә булган һәм чарада аны тәкъдим дә итәчәкләр. «Бу өлкәдә эшләүче белгечләр шулар ярдәмендә кемнәр белән хезмәттәшлек итәргә кирәклеген аңлый алачак», — диде «РЕБУС» форумының оештыру төркеме җитәкчесе Мария Яшенкова.