Казанда узачак Бөтенроссия татар авыллары эшмәкәрләре җыенында 900 делегат катнашуы көтелә

Бөтендөнья татар конгрессы Башкарма комитеты җитәкчесе Данис Шакиров журналистларга хәбәр иткәнчә, чарага илебезнең 37 төбәгеннән 800 татар эшмәкәре, моннан тыш республикабыздан 100 делегат чакырылган. "Алар барысы да авыл яшәешенең нигезен булдырган һәм авылның яшәешен тәэмин итүчеләр", - дип билгеләп үтте ул. Әлеге җыен тәҗрибә уртаклашу, авыл территорияләрен үстерү мәсьәләләре буенча фикер алышу өчен мөһим мәйданчык булып тора. 

Җыенның беренче көнендә делегатлар өч дискуссия мәйданчыгына бүленеп эшләячәк.  «Беренчесе - продукцияне җитештерү, эшкәртү, сату һәм кооперация мәсьәләләре, икенчесе -  авыл хуҗалыгын төрле юнәлешләрдә үстерү һәм кадрлар әзерләү, өченчесе - сыйфатлы азык-төлек, агротуризм һәм сәламәт милләт мәсьәләләре буенча», - диде Данис Шакиров.

30 март көнне, традициягә кергәнчә, делегатлар Татарстанның Тукай, Сарман районнары авылларына барып, татар авыллары, алдынгы хуҗалыклар һәм социаль объектлар белән танышачак. 

31 мартта Татарстан Рәисе Рөстәм Миңнеханов катнашында пленар утырыш көтелә. Шунда ук татар эшмәкәрләре җитештергән товарлардан торган күргәзмә эшләячәк.
Бөтендөнья татар конгрессы Башкарма комитеты җитәкчесенең беренче урынбасары – төбәкләрдәге татар иҗтимагый оешмалары белән эшләү комитеты җитәкчесе Марс Тукаев билгеләп узганча, быел яшьләрнең күп килүе, делегатлар арасында

2006 һәм 2007 елда туган эшмәкәрләр булуы аеруча сөендерә. "Ел да чарага авыллар үсешенә, андагы милли һәм дини яңарышка өлеш керткән, Сабантуйлар уздырган, мәктәп-мәдрәсәләргә ярдәм күрсәткән эшмәкәрләр җыела. Алар бер-берләренә үрнәк тә булып тора. Җыенда булучылар үз төбәкләренә кайтып, авыл тарихын язу, мәчет-мәдрәсәләр торгызу, әлегә кадәр узмаган Сабантуйлар үткәрү белән шөгыльләнә башлыйлар һәм тагын башка бик матур үрнәкләрне үзләренә алалар", - диде ул.

Билгеле булганча, Татарстанда «Туризм һәм кунакчыллык» илкүләм проекты гамәлгә ашырыла.

Салаваҗ Камалетдинов фотосы